Arunachal Pradesh chief minister Pema Khandu chuan an ṭhenawm ram, Myanmar nen chuan khawchhak lamah Pangsau Pass kaltlang leh khawthlang lamah Bhutan nen Luma-Tashigang kawng kaltlangin, insumdawn tawnna ṭha zawk an nei thei tih a sawi. 
Thawhlehnia Itanagar-a Dorjee Khandu Convention Centre-a ni khat awh International Buyer Seller Meet (IBSM) neihah Chief Minister chuan hei hi a sawi a ni. 
CM Khandu chuan, "Arunachal hian ramchhung leh international level-ah pawh a ram ṭhenawm, Tibet, Myanmar leh Bhutan-ten insumdawn tawnna tur theihna ṭha tak a nei a ni. Kum 2047-ah chuan Arunachal Pradesh state chu kan ṭhenawm ramte nena insumdawnna lamah luhka berah siam hman kan tum," a ti. 
Ministry of Commerce hnuaia Agricultural and Processed Food Products Export Development Authority (APEDA) chuan IBSM hi AP-a thlai leh ei tur lam tharchhuahte ram pawn lama thawnchhuah an nih theihna kawng dap pui a, market lama zawmpui an neih theih dan zawnpuina atan IBSM hi a buatsaih a, tun ṭum hi vawi hnih a buatsaihna a ni. Kum 2019 khan meet hmasa ber hi a lo buatsaih tawh a ni. 
Pema Khandu chuan APEDA chuan state-a meet pawimawh tak a buatsaih sak avanga lawmthu hrilhin, sustainable and organic agriculture chu an state-ah chawi lar a ṭul thu a sawi. An state mipui bit lam chu square km 1-ah mi 17 zel chauh cheng an nih avangin, thlai chinna tur ram ṭha tak tak zau tak a la awm a ni, a ti. 
IBSM meet-ah hian India, USA, Australia, Ghana, Indonesia, Bhutan, Myanmar leh Nepal aṭangin buyer 20 chuang an tel a, AP bakah hmarchhak state dang aṭangin an thlai thar chi hrang hrang phochhuaktu hi mi 50 chuang zet an awm bawk.