Dome chim dan pawn lam mi chhui tir dawn

Meghalaya Assembly Building thar tur sak meka a chung mum, dome chim dan chungchang chhui chiang turin pawn lam mi awmna team din High Powered Committee (HPC) chuan a remti.

Thawhlehni khan HPC meeting hi Shillong-ah neih a ni a, meeting-ah hian Assembly speaker Metbah Lyndoh, chief minister Conrad K Sangma, leader of opposition (LOP) Dr Mukul Sangma, MLA - Ampareen Lyndoh, Renikton Tongkhar, Sniawbhalang Dhar leh Dasakhiat Lamare bakah chief secretary leh officer dangte an tel bawk.

Speaker Metbah Lyngdoh chuan, meeting-ah hian building sak mek chungchang hi sawihoin, hma lak dan turte pawn an rel tih a sawi. Mipuite himna atan pawh Assembly building sak mekah hian phalna nei lo chu luh phal a ni dawn lo tih a sawi a, tui putin thil a tihchhiat tur venna atan an khuh dawn tih a sawi bawk. Hemi chhung hian thil thlen dan dik tak chhui tura an tih, audit team chuan an lo chhui dawn a ni.

Audit team hian dome chim chungchang bakah, main hall corridor, reception area leh wing area dinhmunte an enfiah bawk ang. Audit team-ah hian pawn lam mi ruat a ni dawn a, IIT lam mi koh an ni dawn tih sawiin, khawi ber ami nge tih erawh an la tichiang lo niin Lyngdoh chuan a sawi.