Meghalaya CM-in Assam police-te chet dan chhui chiang turin thupek a tichhuak

Assam police-te chuan Meghalaya-a West Khasi Hills district-a Malang-Salbari khuaah tualchhung mite kut an thlak nia sawi a ni a, hemi chungchang hi chhui chiang turin Meghalaya chief minister Conrad K Sangma chuan Nilaini khan police-te a hrilh nghal a ni.

Sangma chuan Assam chief minister Himanta Biswa Sarma chu Thawhlehni khan Assam police-te chetdan hi a sawipui nghal tih a sawi bawk. Sarma chu a ṭul anga hma la tura ngenin, ani pawhin SP leh district police-te hnenah hetiang thil duhawm lo thlen nawn tir tawh lo tura a hrilh tur thu a lo hrilh niin a sawi.

Assam state nena ramri buaina la neih mekna hmun paruka inremna siam leh dan tur ngaihtuahin hma lak leh mek a nih thu CM Sangma chuan a sawi a, hemi rual hian ramri hmun paruka inremna an lo siam tawh chu ennawn a ni tawh dawn lo a, an ziahfel tawh angin kaltlangpui a ni dawn tih a sawi bawk. Sangma chuan inremna an siam dana mi ṭhenkhat zinga hriatthiam lohna awm chhan chu thingtlang khaw 13 hming, Assam leh Meghalaya lamah pawh awm lo ve vete chu an hming tarlan tel a nih loh vang te, sawihonaah pawh telh an nih ve loh vang te a ni, a ti.

Ramri chungchanga inbiak thawh hnihna neih leh tur chungchangah Assam CM nen pawh an inbe tawh tih Sangma chuan a sawi. "A hun tur hi kan la tifel thei lo a, tihtur tam tak kan la nei a, Assam lam pawh inthlan nei turte an awm bawk. Hengte hi zawhfel a nih hunah, inbiak thawh hnihna hi kan ṭah thuai theih kan beisei a ni," tiin a sawi.