Manipur : Rahul rally neihna tur bulah bomb chhar

Assembly election nei tura inbuatsaih mek Manipur-ah chuan, nimin khan Congress vice president Rahul Gandhi-a'n rally a neihna bul, Imphal East district-ah bomb chhar a ni.

Police-te chuan nimin zing dar 6 vel khan Imphal East district-a Khongman Bashikhong Turel Mapal area-a gate pakhat bulah bomb hi hmuh a nih thu sawiin, a hnuah hmun him lamah sut nghal a nih thu an sawi.

Congrss vice president Rahul Gandhi hi Hapa Kangjeibung ground-ah hian Congress candidate-te tan a campaign a ni.

Prime Minister Narendra Modi pawh BJP candidate-te tana campaign-in Manipur-ah hian a kal tawh bawk. PM chuan Manipur-a rorellai, Congress sorkar chu na takin a bei a, Congress sorkarna hnuaiah Manipur chu tihchhiat a nih thu a sawi. Kum 15 zet rorelna chang tawh, Congress sorkar hnuaiah Manipur chuan hmasawnna engmah a nei lo a, ṭhalaite tan hna engmah siam a ni lo tiin a sawi. State mipuite ṭhendarh tumah chief miister Okram Ibobi Singh chu a puh bawk. Hetih lai hian Manipur chief minister chuan Prime Minis­ter Modi-a'n a beihna hi na takin a lo chhang let ve tawh bawk.

Manipur assembly inthlan hi thawh hniha neih a ni dawn a, March 4 leh 8 ah vote thlak a ni ang.