Manipur-a Candidate zingah mi hausa tawn-taw 54 awm

Manipur assembly election thawh khatna chu March 4 hian neih a ni dawn a, inthlan thawh khatna hi assembly bial 60 zinga bial 38-ah neih a ni ang.

Inthlan thawh khatna, constituency 38-a neih tura hian candidate 167 an awm a, an zinga mi 54 chu mi hausa tawntaw, crorepati an ni. An zingah hian hmeichhe candidate pasarih an awm bawk.

Party hrang hrang aṭanga chhutin, Congress leh BJP-te chuan mi hausa tawntaw 21 ve ve an thehchhuak a, National Peoples Party-ah 5, North East India Development Pary-ah 2 leh NCP candidate zinga 2 chu crorepati an ni. Candidate-te sum neih zat hi chawhrualin mi pakhatin cheng vaibelchhe 1.04 nei ang an ni.

Inthlan thawh khatna neih turah candidate zinga hausa ber chu Naga People Front (NPF) candidate Sehpu Haokip a ni a, a hausakna hi cheng vaibelchhe 13 hu a ni. Cheng vaibelchhe 9 hu neitu, BJP candidate Konthoujam Krishnakumar leh cheng vaibelchhe 8 hu neia chhut, INC member Kshetrimayum Biren Singh-te'n an dawt. Candidate zingah mi pakua-in an PAN card detail an tarlang lo.

Candidate zinga pathum chu thubuai rip tak nei lai an ni a, an thubuai neih lai hi tualthah leh inbum kaihhnawihte a ni. BJP candidate 38 zingah 4 in thubuai an nei a, Congress candidate 2, Manipour National Democratic Front candidate 1 leh Nationalist Congress Party candidate 1-te chu thubuai nei lai an ni.

Candidate 72 te chu kum 25 - 50 inkar an ni a, kum 51-80 inkar mi 95 an awm a ni.