Congress sorkarin Manipur dinhmun a tichhia : Rijiju

Union Minister of State for Home Affairs Kiren Rijiju chuan Congress kaihhruai sorkar chuan Manipurm chu dinhmun hniam takah a dah niin a sawi a, an state-a hel punlun chhanah mawhphurtu an ni, a ti.

Kiren Rijiju chuan,"Manipur-ah Congress-in kum 70 chhung vel zet thuneihna an chang tawh a, hei hian nasa takin state dinhmun a ti chhia a ni. Hel an huangtau tulh tulh a, pawikhawihna lian tham a thleng fo bawk. Heng zawng zawngah hian mawhphurtu chu Congress party an ni" a ti. Rijiju chuan Manipur sorkar chu mipuite tana hmasawnna hna thawk chak tawk loah puhin, mipuite harsatna tawh mek chingfel tura hma la chak tawk loah a puh bawk. Manipur hmasawn zelna turin Congress sorkar chu paihthlak a ngai nia sawiin, mipuite chu hmasawnna hna thawk theitu tur sorkar din turin a fuih a, BJP chu mipuite tana hmasawnna hna thawk theitu tur niin a sawi.

MoS Kiren Rijiju hian Thawhṭanni khan Chandel-a election rally buatsaihah thu a sawi a, BJP tana campaign-in Congress party chu na takin a bei a ni. Bharatiya Janata Party (BJP) president Amit Shah pawhin Manipur chief minister chu sorkar laipui aṭanga sum hmuh dik lo taka hmangah a puh ve bawk.

Party hrang hrangten ngawrh taka campaign beihpui an thlak mek lai hian, United Naga Council (UNC)-te chuan, Chief Minister Okram Idobi Singh leh Manipur Pradesh Congress Committee (MPCC)-te chu Manipur Legislative assembly election vawi 11-na neih tura campaign beihpui thlak mekah, Naga-te chenna huam chhunga campaign lo tuin an hriattir. CM Ibobi Singh-a kaihhruai sorkar chu Naga mipuite ngaipawimawh lo leh, rahbe tuma hmalaah puhin, Naga-te chenna huam chuungah campaign neih an remti lo tih an sawi.