Manipur Poll : Rahul Gandhi-a'n Modi-a chhanglet

Prime Minister Naren­dra Modi-a'n Naga hel, National Socialist Council of Nagaland - Isak-Muivah (NSCN-IM)-te sorkar laipui inremna ziahpui mah se Manipur sorkar chuan ngaihven zui loin a muthluk san niin a sawi a, hei hi Congress Vice President Rahul Gandhi chuan chhangletin, Mani­pur sorkar hmalakna leh hlawhtlinna te chu hmuh hmaih lo turin a chah.

Thawhlehni khan Rahul Gandhi hian Hapta Kangjeibung-a vantlang inkhawmah thu sawiin, sorkar laipui leh NSCN-IM-te'n kum 2015-a 'Framework Agreement' an ziah theih nana Manipur sorkar hmalaknate chu hmuh hmaih lo tur leh, ngawih bopui lo turin Modi a chah tih a sawi. BJP chuan Congress kaihhruai sorkar chu dik lo takin an bei tih sawiin, Modi-a'n United Naga Council (UNC)-te'n National Highway (NH) an danchah chhana a puh chu party tihmingchhiat tumna a ni, a ti. Modi-a'n ṭhalai mi vaibelchhe hnih vel tan hna pek a tiam a, sorkarna an chan

aṭanga ni 100 chhungin NH 37 chei ṭhat a tiam bawk a, mahse hei hi tun thlengin a la tihlawhtling lo a, Manipur chakkhai lamna kawngpui pawimawh, NH 37 a chhiat lutuk avanga mipuiten harsatna an tawk chung pawhin BJP kaihhruai sorkar laipui chuan hmalakna a nei chuang lo tih Rahul Gandhi-a chuan a sawi bawk.

Congress vice president chuan, sorkar laipuiin NSCN-IM-te inremna a ziahpui chungchang sawiin, Modi chuan inremna ziah a nih thu hi Congress President Sonia Gandhi chu phone hmangin a hrilh a ni, a ti. He thil hi chhui chian a ni a, inremna ziak tur hian Manipur Chief Minister Okram Ibobi Singh bakah, central-a minister ṭhenkhatte pawh rawn an ni lo tih a sawi. Tun hnaia Modi-a'n Manipur a tlawh ṭum pawhin zirlai pawl leh pawl dang eng emaw zat chuan inremna ziah a nih dan chungchang sawifiah turin an phut a ni, a ti bawk.

Rahul chuan CM Okram Ibobi-a eirukna laka fihlim lo anga a puh chu chhuichian an huam thu sawiin, mimal intihhmingchhiat tumna a ni a, pawmzam mai theih a ni lo, a ti. Congress sorkar hnuaiah mipuite an him nia sawiin, kum 15 ro an rel chhunga hmasawnna te chu chhuanawm a tih thu a sawi bawk. Manipur Deputy Chief Minister Gaikhangam chuan Hapta Kangjeibung-a vantlang inkhawm buatsaihah hiam mi 400,000 chuang an pungkhawm tih sawiin, tun hnaia mipui punkhawm tam ber ṭum niin a sawi. Congress sorkarah mipuiten rinna an nghat tih sawiin, sorkarna an siam leh ngei a rin thu a sawi.

Manipur assembly election hi a thawh khatna chu March 4 hian neih a ni dawn a, March 8-ah inthlan thawh hnihna neih leh a ni ang. Party hrang hrangte chuan campaign an nei ngawrh tawh hle a, kawng hrang hrangin an inbei nasa hle bawk. Bharatiya Janata Party (BJP) president Amit Shah chuan Manipur Chief Minister Okram Ibobi Singh chu sorkar laipui aṭanga sum an hmuhte dik lo taka hmang niin Thawhlehni khan a sawi.

Amit Shah chuan Ibobi Singh-a kaihhruai sorkar chu eirukna laka fihlim lo leh, hmasawnna hna thawk ṭha tawk loah a puh. Manipur chuan model state ni thei turin theihna an nei a, mahse Congress kaihhruai sorkar chuan hniam takah a hnuk thla niin a sawi bawk. Hetih lai hian rorel lai Congress party chuan central-a BJP minister-te'n an state an tlawh chamchi chu awmze nei lo leh sum khawhralna mai niin an sawi a, sum hmanga mipuite bum tumah an puh bawk.