Rijiju-a'n hmarchhak infiam mite a fak

Union Minister of State for Home, Kiren Rijiju chuan hmarchhak infiam mite chu fakawm a tih thu leh, a mimal tak pawha a chhuan thu a sawi.

Tun hnai khan hmar­chhak infiam mi zinga mi hmingṭha zualte chu sorkar laipui chuan chawimawina hlanin, pawisa faia pek an ni. Chawimawina hlan zingah hian Olympic gymnast Dipa Karmakar pawh a tel a, Tripura nula Dipa hian Brazil-a Olympic neih zawh takah khan India ai a awh a ni. A ni bakah hian Indian women hockey captain P Sushila Chanu, Olympian L Bombayla Devi (archery), H Lal Ruatfeli (hockey), K Chinglensan Singh (hockey), K Kothajit Singh (hockey) leh Saikhom Mirabai Chanu (weightlifting)-te an tel. An vai hian pawisa fai cheng nuai hnih ṭheuh hlan an ni.

Hmarchhak infiam mite chawimawina hlanna hi Kiren Rijiju chuan hmanpuiin, hmarchhak ṭhalaite chuan talent an neih ṭhat thu leh, hmasawn zel tura theihna an neih thu a sawi. infiam mi chhuanawm tak takte chu midangte tana entawn tlak an nih thu sawiin, anmahni chawimawi chu an tih tur dik tak a nih thu a sawi. Lawmna inkhawm hi Congress MP - Vincent Pala (Shillong), Ninong Ering (Arunachal) bakah, Ministry of Development of North Eastern Region (DoNER) minister Jitendra Singh pawhin a hmanpui a ni.