Meghalaya sorkarin cyber cell din

Meghalaya sorkar chuan cyber crime pung zel doletna tur leh, a chhuizuina kawnga chak zawka hma lak a nih theih nan Cyber Assistance Cell (CAC) a din thu Thawhlehni khan a puang.

CAC hi Meghalaya police, CID cyber crime wing hnuaiah din a ni a, mobile phone leh internet kaltlanga sualna chi hrang hrangte a chhuizui ṭhin dawn a ni. Criminal Record Bureau superintendent of police D Jyrwa chuan CAC din a ni ta chu lawmawm a tih thu sawiin, hei hian cyber crime pung chak zel venna kawngah leh, thubuai chhui kawngahte nasa taka a puih theih tur thu a sawi. 

CAC hian internet-a saruak thlalak thehdarh thubuai te, mimal intihmingchhiat tumna thubuai te leh internet kaihhnawih thubuai hrang hrangte a chhui dawn a ni, a ti. Mipuite chu hetiang thil kaihhnawiha harsatna an tawk a nih chuan police station hnai berah hriattir ṭhin turin a ngen bawk.

Meghalaya sorkar hian cyber crime police station (CCPS) din turin hmalakna a kalpui mek a, police eng emaw zat chu cyber crime chungchangah zirtirna pek a tum bawk.