Assam tuilian : Relief camp-ah mi 66,000 chuang la awm mek

Assam State Disaster Management Authority (ASDMA) chuan district panga-ah tuilian tuar mi 66,836-te chu sorkarin relief camp a siamah an la khawsa mek tih a sawi a, district 12-a mi nuai 5.21 chuang chu tuilian hian a la nghawng tih a tarlang bawk. Relief camp-a awm zingah hian naupang 13,988 an awm tel.

Assam-a tuilian leh leimin vanga thi chu nimin thleng khan mi 30 an tling tawh. Tuilian hi district pasarih ten an la tuar mek a ni.

Sorkar chuan tuilian tuarte chhawmdawlna turin buhfai, dal leh chi quintal 1,243.65, eirawngbawlna tel litre 5,075.11, bawngchaw quintal 300 bakah an mamawh dangte a sem tawh a ni.

Cachar district-ah mi 51,897 chu relief camp-ah an la awm a; Hailakandi, Morigaon, Nagaon leh Dima Hasao-ah mi eng emaw zat an la awm. Ruahsur nasa avanga tuilian leh leimin hi central Assam leh South Assam-in an tuar zual a ni.

Tuilianin Lumding-Badarpur section rel kawng a tihchhiat avangin, Northeast Frontier Railways chuan Dima Hasao kaltlanga South Assam, Manipur, Tripura leh Mizoram rel service chu ala tihtawp chhunzawm a, rel service tir leh thuai a ni theihna turin rel kawng siamṭhat hna hi ngawrh taka thawh mek a ni.

Ministry of Home Affair-in Assam-a tuilian leh leminin chhiatna a thlen dante enfiah tura a tirh, inter-ministerial central team (IMCT) chuan Ningani khan Assam hi an thleng a, Pathianni thleng an awm ang. Ningani khan ASDMA bakah revenue and disaster management official-te an kawm a, state chhunga chhiatna thlen dante an sawipui.

IMCT hi group pahnihah inṭhenin, tuilian vanga chhiatna thlen zualna district-te an tlawh dawn a ni. Group pakhatna hi Cachar leh Dima Hasao district tlawhin, group pahnihna hian Darrang, Nagaon leh Hojai district an tlawh ang. District hrang hrangte an tlawh hnuah, report siamin sorkar laipuiah an thehlut dawn a ni.

ASDMA chuan tuilian hian thingtlang khaw 956 a la chim mek a, thlai chinna ram hectare 47,139.12 a chim chhe tawh tih a tarlang.