Meghalaya HM-in Civil Hospital-a facility thar a hawng

Meghalaya health and family welfare minister James PK Sangma chuan Ningani khan Shillong-a Civil Hospital-ah Biological Waste Management System, khum 10 awmna Geriatric Ward leh P.S.A Oxygen Generation Plant a hawng.

Facility thar hawnna inkhawm hi Joint Director of Health Services, Civil Hospital, Shillong buatsaihin hospital chhungah neih a ni.

Minister Sangma chuan civil hospital-a medical leh non-medical staff-te thawhrimna leh inpeknate fakin, hospital-a facility thar pathum hawn belh chuan Meghalaya-in hmasawnna a hmuh belh zel tih a tilang a ni, a ti. State chhung hmun danga medical health facility dangte pawh thuam chak zel a ṭul thu a sawi bawk.

Health and Family Welfare Department principal secretary, Sampath Kumar chuan an state-a Covid-19 hri dona kawnga Civil Hospital hnathawkte chu fakin, hospital-a service pawhin hma a sawn zel thu a sawi. He hospital-a cancer wing chu hman ṭan a nih tawh thu leh, theihtawp an chhuah zel chuan kum reiloteah super speciality hospital-ah hlankai a la ni thei dawn a ni, a ti.