Assam minister hnenah show-cause notice pe

Assam chief minister Himanta Biswa Sarma chuan a minister zinga pakhat, Sanjay Kishan chu inlakhran duhtu pawl, United Liberation Front of Asom (ULFA) hotu Paresh Baruah laka thupha a chawi avangin show-cause notice a pe.

Tea Tribes and Employment minister Kishan hi ULFA chungchangah eng nge a dinna dik tak sawichiang tura tih a ni.

Tun thla tir lam khan Kishan hian ULFA hotu Paresh Baruah hi February thlaa an pawl camp-a hel zinga intihlum an awm nia a sawi chungchangah 'dawt sawi hmang' tiin a sawi a ni. He a thusawi avang hian ULFA chuan Kishan hi thupha chawi turin an ti a, darkar 24 hun an pe bawk. Hemi chhunga thupha a chawi lo a nih chuan Upper Assam-a Tinsukia leh Dibrugarh district-ah public function a neihte an boycott vek dawn tih an sawi.

ULFA-ten an vau avang hian Minister chuan May 15 khan thupha chawina thuchhuah a siam zui a ni. Thuchhuah a siamaah Kishan chuan, "Thalai ṭhenkhat ULFA zawmtute chungchang chauh ka sawi a ni. Mahse ka thusawi hian Paresh Baruah rilru a lo ti na a nih chuan thupha ka chawi e, " tiin a sawi a ni.

Officer 30-ten CM hnenah complaint thehlut
Assam-a Cachar district-a officer 30-te chuan chief minister Himanta Biswa Sarma hnenah complaint thehlutin, Lakhimpur BJP MLA Kaushik Rai chu officer duty laite chungah mawi lo leh inluling taka chein, a vau zui bawk niin an sawi.

Chief Minister hnena memorandum an thehluhah hian MLA hian Assam Civil Service cadre chu a hmusit hle niin an sawi. Lakhimpur MLA hian Govindanagar Shivbari High School-a tuilian tuarte awmna tur relief camp siam a tlawh ṭumin officer duty-te chungah a che mawi lo hle a, Sonai BDO Hussain Mohammad Mobin chu vuak hrep tlak nitein a sawi tih an tarlang. Hei bakah hian Circle Officer-te pawh chhawmdawlna te an sem ṭhat loh chungchangah hremna pek an ngai tih a sawi a, officer-te chu eptu party-te duhdana thawk leh an agent niahte a puh tih an tarlang bawk.