IOC-in Bangladesh kaltlangin Tripura-ah fuel thawn tum

Assam-a tuilian leh leimin Dima Hasoa district-a rel kawng a tihchhiat avangin South Assam, Mizoram, Manipur leh Tripura-a rel service tihtawp chhunzawm a la ni a, hei vang hian Assam ṭhenawm state-te hian fuel lakluh kawngah harsatna an la tawk a ni.

Rel service tihtawp a nih avangin Tripura chuan Meghalaya kawngpui kaltlangin fuel hi an lalut a, mahse a senso hi a let zetin a to phah a ni. Hei vang hian Indian Oil Corporation (IOC) chuan Bangladesh kaltlangin Tripura-ah hian fuel thawnluh dan ngaihtuah a tum a, inbiakna neih mek a nih thu a sawi.

IOC chuan inremna siam theih a nih chuan, Guwahati-a Betkuchi depot aṭangin Bangladesh kaltlangin Tripura-a Dharmangar depot-ah oil hi thawn luh a ni dawn tih a sawi. A tirah chuan full convoy an tir nghal thei lo maithei tih IOC Executive Director (IndianOil-AOD) G Ramesh chuan a sawi a ni.