Manipur activist Haokip judicial custody-ah dah

Manipur human rights activist Mark Thamang Haokip chu ni 15 chhung judicial custody-a dah a ni.

Mark Thamang Haokip hi kar liam ta Thawhlehni khan Delhi-ah man a ni a, Zirtawpni khan Imphal-ah hruai thlen a ni.

International Human Rights Association unit president nilai, Haokip hi social media-a a thu post, hnam inkarah inhuatna chawhchhuahna lam hawi post-a puh a nih vangin man a ni. Police-te chuan Haokip hian India-a Manipur inchhunluh chungchang dik lo takin a ziak a, Manipur lalin Indian Union inremna a ziahpuiah mel 700 chauh huamin, tribal lal leh an hote awmna ram chu a huam tel lo niin a sawi tih an tarlang.

A thu post avang hian Churanchandpur district police-te chuan IPC section 153-A/ 505 (2) hnuaiah Haokip hi hnam inkara inhuatna chawh chhuah tuma puhna kaihhnawihah a lakah FIR an ziaklut a ni. Civil society organisation 10 hruaitute pawhin Haokip lakah hian complaint an thehlut tih an sawi bawk.

Hetih lai hian Haokip man a nih avangin Churachandpur-ah mi eng emaw zatin lungawi lohna an lantir a, hei vang hian Churanchandpur-ah chuan tiam chin awm loin CrPC 144 hnuaiah punkhawm khapna thupek puan a ni bawk. Churachandpur-a nawrh huaihawtte leh police-te innawr buaina avang hian mi 13 in hliam an tuar a, an zingah police pathum an tel. Haokip thlawptute hian Kangkokpi district headquarters-ah rally an huaihawt bawk a ni.