Manipur : Amit Shah-a'n NH danchah tihtawp nghal a tiam

Bharatiya Janata Party (BJP) national president Amit Shah chuan Manipur-ah BJP-in sorkarna an siam a nih chuan, sorkarna an chan aṭanga darkar 24 ral hma ngeia National Highway (NH) danchah tihtawp nghal a nih tur thu a sawi.

BJP hruaitu Amit Shah hian Manipur tlawhin, an party tan a campaign a, Imphal-a vantlang inkhawm buatsaihah he thu hi a sawi a ni. United Naga Council (UNC)-te'n tiamchin awm loa Manipur chakkhai lamna kawngpui pawimnawh an dangchat chu a dem thu sawiin, sorkarna an siam a nih chuan an tihtawp nghal tur thu a sawi. NH danchah a nih avanga mipuite chunga tawrhna thleng mek chu pawi a tih thu sawiin, harsatna sutkian thuai a nih theih nan hma an lak tur thu a sawi. State mipuite chu BJP sorkar a din theih nana thawhpuiah a sawm a, an hmachhawp hrang hrangte a tarlang a ni.

Amith Shah chuan Congress sorkar bei zuiin, "Eirukna laka fihlim lo sorkar hi a ding reng a nih chuan Manipur chuan hniam lam a pan zel dawn a ni" tiin, Congress kaihhruai sorkar chuan Manipur chu dinhmnun hniam takah a dah mek zel niin a sawi. Congress party-in kum 15 ro a rel chhungin hmasawnna hna thawh sawi tham a awm lo tih sawiin, eirukna laka filhim lo sorkar chu paihthlak a hun tawh tih a sawi. State dinhmun chawikang leh tur leh, sang taka an awm theihna tur chuan Congress sorkar hnawl ngam a hun tawh niin a sawi. BJP chuan Manipur chu state dangte tan pawha entawn tlak ni thei turin, kum nga chhungin 'model state'-ah siam an tum tih a sawi.

UNC-te'n NH an dan chungchang sawiin, a chinfel chu state sorkar kuta awm a ni, Amit Shah chuan a ti. State sorkar pui turin sorkar laipui chu a inhawng tih sawiin, a tak a chin fel erawh state kuta awm a ni, a ti. BJP-in sorkarna an siam a nih chuan, hun rei tak ata tawh mipuiten harsatna an tawh chu hun reilote chhunga chinfel a tiam a ni. BJP national president chuan sorkarna an siam a nih chuan state boundary an ngaih pawimawh tur thu sawiin, Congress sorkarin a hlamchhiah thil ṭhenkhat tharthawh leh tur a awm thu a sawi. Mipuite tan tun hun hi Congress kaihhruai sorkar laka an phuba lakna remchang a nih thu sawiin, vote hmanga phuba lak a hun tawh a ni, a ti.

BJP president chuan, Manipur mipuite tan democracy vawn nun thar leh a, eirukna laka fihlim, bandh-in a tihbuai loh leh pawl hrang hrangte nawrh huaihawt lohna state-ah chantir an tum thu a sawi bawk. Imphal bakah Ukhrul-a vantlang inkhawm buatsaihah thu sawiin, Wangkei Assembly constituency-ah campaign beihpui a thlak a, party mi leh sa ṭhahnem takin an ṭawiawm a ni.