Inchhirna ka nei lo : TR Zeliang

Nagaland chief minis­ter kal chhuak ta, TR Zeliang chuan CM a nihna aṭanga banna a thehluh chung­changah inchhirna a neih loh thu a sawi.

TR Zeliang hi Manipur assembly election neih turah Naga People's Front (NPF) tan a campaign a, tun hnai khan Tamenglong-a vantlang inkhawm buatsaihah he thu hi a sawi a ni.

Zeliang chuan MLA tam zawkten an la thlawp thu sawiin, heti chunga banna a thehluh chungchangah hian inchhirna a nei lo tih a sawi. Amah thlaktu atana lakluh tak chief minister Dr Shürhozelie Liezietsu-a lakah rinna a nghah thu sawiin, NPF kaihhruai DAN sorkar chuan hma a sawn zel a rin thu a sawi. NPF chu Naga-te tan chauha ding a ni lo tih sawiin, Manipur hill area-a hnam hrang hrangte tana ding a nih zawk thu a sawi.

NPF chu sang taka awm a ni lo tih Zeliang chuan sawiin, national party-te anga lian ni lo mah se, an mi leh sate tana theih tawp chhuaha beitu a ni,a ti. Manipur assembly-in anti-tribal bill pathum a pass dodal a, NPF MLA-te'n banna an thehlut ngam chu fakawm a tih thu sawiin, NPF chuan mipuite a phatsan ngai lo a ni, a ti. Manipur sorkarin Tousem leh Tamei sub division-te ṭhendarhin, Nonei leh Jeribam district-te din thar mah se mipuite inkarah daidanna a awm loh thu a sawi a, Manipur, Assam leh Nagaland-a Naga-te chu an awmna hrang mah se an rilru erawh a inpawh tlat tih a sawi bawk.

Hetih lai hian Nagaland Pradesh Congress Committee (NPCC) chuan chief minister TR Zeliang leh Education minister Yitachu-te chu central-a hruaitu lawkten bang turin an nawr lui niin an sawi. Zeliang-a chu minority tribe a nih vanga bang tura nawrluih a nih thu an sawi a, sorkar laipui chuan bang turin na takin a nawr a ni, an ti. Zeliang chu dinhmun sang tak luaha a lo kir leh ngei an beisei thu leh, duhsakna n hlan thu NPCC chuan an tarlang.