Meghalaya Lokayukta in check-gate a eirukna chhui chiang turin CBI a ngen
Meghalaya Lokayukta chuan Central Bureau of Investigation (CBI) hnenah Bangladesh lama bungraw phur ṭhin motorte hnen aṭangin East Jaintia Hills-a check gate duty ten thamna a la ṭhin nia sawi chungchang chu chhui chiang turin a ti.
Check-gate a thamna pawisa lak ṭhina hian sorkar official inhnamhnawih an awm tel nia sawi a ni bawk. Lokayukta Chairperson PK Musahary chuan CBI SP hnenah ni 15 chhungin he thil thleng hi chhui a, report thehlut turin a ti a ni. Check gate-ah hian bungraw phur truck-te hnen aṭangin sorkarin chhiah a lak dan kalphung ni loin a hranin thamna pawisa an phut ṭhin nia sawiin Lokayukta-a hian petition thehluh a ni. Petition-ah hian pawisa phuttute zingah hian police leh sorkar official-te pawh an tel nia sawi a ni a, hei vang hian he thil thleng hi chhui chiang tur leh, thil dik lo titute hrem turin an ngen. Dan loa pawisa an lo lak ṭhin avangin hian state sorkarin chuan kumtin a sum hmuh tur cheng vaibelchhe 1,000 vel a hloh phah niin an sawi bawk.