Assam sorkarin sakhaw paruk hnenah minority certificate pe dawn

Assam sorkar chuan an state-a sakhaw tlem zawk parukte hnenah minority certificate pek a remti.

Pathiannia Dispur-a cabinet meeting chuan sakhaw paruk - Muslim, Kristian, Sikh, Buddhist, Jain leh Parsi-te hnena minority certificate pek rawtna chu a pawm a ni.

Health minister leh sorkar thupuangtu, Keshab Mahanta chuan scheduled caste certificate leh backward caste certificate pek ang hi sakhaw lam tan pek a ni ngai lo tih a sawi a, mahse cabinet chuan heng sakhaw tlem zawkten minorities welfare department-in scheme a siamte aṭanga hamṭhatna an dawn theihna turin religous community tan hian certificate pekchhuah hi an rel tih a sawi. Certificate pek chhuah theih dan kimchang erawh sawiho leh a ni ang.

Kum 2011 chhiarpuiah khan Assam mipui zinga 61.47% chu Hindu an ni a, Muslim 34.22%, Kristian 3.74%, Sikh 0.07%, Buddhist 0.18% leh Jain 0.08% an awm. Assam Minorities Development Board chuan minority certificate pek tur sakhaw parukah hian mi maktaduai 16 an awm a ni.

State sorkarin minority certificate pek a tum hi eptu party leh minority institution-te chuan an sawisel a, Constitution-ah minority status pek tur chin chu sawilan vek a ni a, a hrana sorkarin a lo pek hi a ngai lo niin an sawi. BJP sorkarin hetianga a tihna chhan hi a phena thil tum a neih vang niin an puh.

Assam Congress president Bhupen Kumar Borah chuan, "Hei hian BJP-in inṭhendarh policy a kalpuina tizualtu tur zawk a ni. Minority community hrang hrang karah inṭhendarhna siamin, rorellai party-in khawtlangah khi a siam belh zel dawn a ni," a ti.

All India United Democratic Front (AIUDF) organising secretary Md Aminul Islam pawhin BJP chuan an thiltih phenah hian inṭhendarh tir tuma ruahmanna an neih ngei a rin thu a sawi bawk.