Assam tuilianin ziaawm lam pan zel ; Mi nuai 4 chuangten harsatna an la tawk

Assam-a tuilian chuan ziaawm lam a pan zel a, hetih lai hian district pali-ah mi nuai 4 velin tuilian vang hian harsatna an la tawk mek.

Assam State Disaster Management Authority (ASDMA) report chuan Cachar, Dima Hasao, Morigaon leh Nagaon district-ahte mi 4,01,800-te chu tuilian hian an nunphung a la tibuai tih a sawi.

Nagaon district hian tuar nasa berin, mi nuai 2.91-ten harsatna an la tawk mek a, Cachar-ah mi 68,500 chuang leh Morigaon-ah mi 41,000 velin tuilian hi an tuar a ni. District paliah hian relief camp leh distribution centre 106 siam a la ni a, heng hmunah hian mi 31,645 an khawsa mek a, an zingah naupang 6,919 an tel.

Tun hnaia Assam-a ruahsur nasa vanga tuilian leh leiminah hian mi 32 in nunna an chan tawh a ni. Thingtlang khaw 596 chu tuiin a la chim mek bawk.