Nagaland sorkarin inbiakna chhunzawm turin NSCN(IM) ngen

Nagaland sorkar-a Core Committee on Naga Political Issue (NPI) chuan NSCN(IM) chu sorkar laipui nena inremna kawng zawnga inbiakna chu chhunzawm leh turin a ngen.

Chief minister Neiphiu Rio kaihhruai, Core Committee chuan kar liam ta Inrinnia NSCN(IM) nena meeting an neihah he ngenna hi an siam tih United Democratic Alliance (UDA) chairman TR Zeliang chuan a sawi.

Inbiakna neiha sorkar laipui palai, AK Mishra chuan April thla khan Nagaland a tlawh a, hemi hnu hian NSCN(IM)-te hi New Delhi-ah kal ve lehin kar liamta khan Nagaland-ah an kir leh. An kir hnu hian sorkar laipui chu inbiakna an neihpui tawh dawn lo tih an sawi a ni.

Hei vang hian Core Committee chuan NSCN(IM) chu inbiakna hi chhunzawm leh tura ngenin, inbiakna hmang lo chuan inremna siam theih a ni dawn lo a ni, a ti.