Meghalaya Police Academy hawng

Meghalaya Police Academy chu Nilaini khan chief minister Conrad Sangma'n a hawng.

Police Academy hi Umran, Niangbymai-ah awmin, North Eastern Police Academy (NEPA) nen pawh a inhnaih hle. He academy hian trainee 40 a la thei dawn a ni. 

Chief minister Conrad Sangma chuan academy a puitlin theihna tura kum 2011 aṭanga project an thawhna kawnga tha thawhtu zawng zawngte chungah lawmthu a sawi.

Police academy hawn thar chu research centre anga hman tel a nih dawn thu leh, data leh analysis siamna kawngah department dangte pawh a thawhpui tur thu a sawi.

Hun a inthlak danglam ang zelin dan leh thupek kenkawh dan pawh uluk a ngai zel tih CM chuan a sawi a, hei vang hian dan kengkawhtu turte pawhin specialised training and skill an mamawh tawh a ni, a ti. Cyber crime te pawh a hluar chho zel a, hei vang hian heng buaipui tur hian skill leh technology thar te zirchian a, thiam zel a ngai a ni, a ti. 

Home minister James Sangma pawhin thu sawiin, academy sakna tur hian kum 2013 khan 13th Finance Commission chuan cheng vaibelchhe 50 a pe ta, 15th Finance Commission in a thawh hnihnaah cheng vaibelchhe 92 a pe leh bawk tih a sawi.