Meghalaya-ah Black flag protest huaihawt
Confederation of Meghalaya Social Organisations (CoMSO) chuan an state-a Inner Line Permit (ILP) system hman phutna sorkar laipuiin tun thlenga a la ngaihtuah sak duh loh avanga lungawi lohna lantirin, nimin khan state pumah black flag protest an huaihawt.
Pressure group hrang hrang chuan Meghalaya-a rorellai, Meghalaya Democratic Alliance (MDA) sorkar chuan ILP system nawr chungchang hi a ngai pawimawh tawk lo nia sawiin, state sorkar chungah pawh an lungawi lo hle.
CoMSO secretary Roy Kupar Synrem chuan Covid-19 leng avangin nawrh huaihawt lian tham buatsaih theih a ni lo tih a sawi a, "Hetiang dinhmun hi tawng mek lo ila chuan kan boruak pawh a dang hle ang. State sorkarin ILP system hi a tipuitling thuai lo a nih chuan nawrna pawh a tawk nasa hle dawn a ni. Hei hi CoMSO thil phut bik chauh a ni a, pressure hrang hrang pawhin an phut vek a ni. Pawl hran ni mah ila, kan duh ber chu a in ang vek a, sorkar laipui chu Meghalaya-a ILP system hmanna tur pawm thuai turin kan duh vek a ni," a ti. Nikum December 13 khan CoMSO hian ILP hman phutin nawrh lian tham tak an lo huaihawt tawh a ni.
Hmarchhak state dangten ILP system an hman reng tawh laia, tun thlenga Meghalaya-a hman phutna pawmsak a la ni lo chu an lawm lo hle tih Synrem chuan a sawi a, December 4 hian Shillong leh district hrang hrangah sit-in protest huaihawt chhunzawm leh an tum tih a sawi.