ENSF-in Nov 30 aṭangin sorkar laka lungawi lohna lantir dawn

Eastern Naga Students' Federation (ENSF) chuan Nagaland sorkar-in an thil phut a tihhlawhtlin loh avangin November 30 aṭangin state sorkar laka lungawi lohna lantirin, tiam chin awm loa nawrh  huaihawt an tum. 

ENSF hian Nagaland Staff Selection Board (NSSB) leh Nagaland Public Service Commission (NPSC)-a hna lakah post 45% chu kum 20 chhung state chhunga  hnam paruk- Sangtam, Konyak, Yimchunger, Khiamniu­ngam, Phom leh Chang hnam puala dah an phut a ni. Hei bakah hian NSSB board chairman leh member pahnih chu recognised Naga tribe-te a chhawka dah turin an phut bawk a ni. November 18 khan chief minister hnenah an thil phut  hi thlenin, ni sarih chhunga ngaihtuah turin an phut a ni. Mahse hun tiam chhunga state sorkarin an thil phut a ngaihtuah sak loh avangin lungawi lohna lantir hi an tum ta a ni. 

Kohima-a press conference an neihah, ENSF president Sepili Sangtam chuan sorkara ngenna an thlen hnuah ngaihsak a ni lo a, hemi hnu pawh hian CM chu an hriattir nawn leh tih a sawi. Hetichunga an thil ngente ngaihtuah a ni lo chu an lungawi lo tih sawiin, "Nagaland sorkarin Eastern Naga leh ENSF a en dan hi kan lawm lo a ni," tiin emergency meeting neih hnuah tiam chin awm loa nawrh huaihawt hi lungrual takin an rel tih a sawi. December 1-a statehood day lawmna tur leh, virtual hornbill festival neih tur pawh an boycott dawn tih a sawi bawk. 

Eastern Naga chu sorkarin a ngaihthah bik tih sawiin, state chhung hmun dangte nena rorelna rualkhai leh ang khat veka kalpui an duh tih ENSF chuan a sawi. Official record-a a lan danin, state sorkar hnuaia hnathawk nuai 1.3 chuang zingah heng hnam paruk zingah gazetted officer chin awm chu 6% pawh an tling lo tih sawiin, grade III leh IV-ah pawh 9-10% vel chauh an awm pha a ni, an ti. Hei vang hian kum 20 chhung heng hnamte chanpual siamsak a nih chuan, Naga hnam dangte nen an dinhmun pawh a inrualkhai chho dawn nei niin an sawi a ni.