Manipur Poll : Inthlan thawhkhatnaah vote 84% a tla

Manipur assembly election thawh khatna chu Inrinni khan neih zawh a ni a, vote 84% a tla.

Polling station 1,643-ah mipuiten vote an thlak a, central paramilitary force mi 8,408-te chuan venhim hna an thawk a ni. A thawh khatnaah hian candidtae 168 an awm a, an zingah hian hmeichhia pasarih an tel. Inthlan thawh khatna hi district paruka constituency 38 a neih a ni. Official-te chuan inthlan thawh khatna hi boruak muanawm tak hnuaiah neih a nih thu an sawi a, venhimna khauh tak hnuaiah mipuiten vote an thlak tih an sawi. Polling station ṭhenkhatah Elelctronic Voting Machine (EVM) chhia a awm avangin hun rei vak lo a khaihhlak a, buaina lian tham dang thleng a awm hriat a ni lo.

Imphal East, Imphal West, Bishnupur, Kangpokpi, Chura­chandpur leh Pherzawl district-ahte hian vote a tla ṭha thawkhat hle. Imphal East-ah chuan vote tla hi 89% a tling phak a, Imphal West (86.90%), Bishnupur (87.80%), Kangpokpi (80%) leh Churachandpur, Pherzawl district-ahte 68% a tla a ni. Nambol, Bishnupur, Yais-kul, Khurai, Singjamei leh Uripok bialahte Voter-Verified Paper Audit Trail (VVPAT) hman a ni. Manipur assembly election-a hman tur bik hian mobile application - Suvidha, Samadhan, Sugam, Poll Star, E-Manipur-te chu duan a ni bawk.

Chief Electoral Officer Vivek Kumar Dewangan chuan, mipuiten vote an thlak ṭhat thu sawiin, kum upa tak tak pawhin an aiawha roreltu tur an thlang tih a sawi. Hetih lai hian Thangmeiband assembly constituency-ah chuan buaina tenau chhuakin, Congress worker-te chuan People’s Resurgence and Justice Alliance (PRJA) candidate an bei a, hliam a tuar a ni. Thangmeiband constituency-ah hian Rights activist Irom Sharmila-i party PRJA, Congress leh BJP candidate-te chu an inkhing a, boruak pawh a sang hle.

A thawh khatna hi assembly bial 60-a bial 38-ah neih a ni a, candidate 167 an awm. Party lian pahnih Congress leh BJP-te chuan candidate an ngah ber a, BJP chuan constituency 38-ah candidate nei kim vekin, Congress chuan candidate 37 a thehchhuak ve bawk. Candidate zingah thubuai nei an awm nual a, BJP candidate 38 zingah 4 in thubuai an nei a, Congress candidate 2, Manipur National Democratic Front candidate 1 leh Nationalist Congress Party candidate 1-te chu thubuai nei lai an ni bawk.

Inthlan thawh khatnaah hian vote nei mi 11,32,525 zinga 9,28,573 chuan vote an thlak a, service voter 7084 an awm bawk. A thawh hnihna hi March 8-ah neih leh tur a ni a, March 11-ah vote chhiar a ni ang a, result puan nghal a ni ang.