NEHU VC ban turin Prime Minister ngen

Meghalaya Confederation for Academic Welfare (MeCAW) chuan prime minister Narendra Modi hnenah memorandum thehlutin, North Eastern Hill University (NEHU) vice chancellor (VC) SK Srivastava chu ban a, search-cum-selection committee kaltlanga full-time VC ruat turin an  ngen. 

MeCAW chuan VC Srivastava chu academic, administrative leh financial management-ah university inkaihhruaina te palzut a, a thuneihna dik lo taka hmangah an puh a ni. VC chu hun rei tak tak chawlah puhin, a chawlh laia RTI hmanga zawhnate pawh chhang loah an puh bawk. Department Head pahnih a ban dan te, university-a thawh hmeichhiate leh research scholar-te chunga mawi lo taka a chet dante chu MeCAW chuan a ngaimawh hle tih PM hnena memorandum an thehluhah an tarlang. 

VC chuan school of studies-ah senior zawkte ruat loin, a junior zawkte chu dean atan a ruat tih MeCAW chuan a sawi a, zirtirtu leh zirlai pawlte pawh sawipui loin university hminga loan, cheng vaibelchhe 136 zet lak rawtna te a siam a, hei  hian ama thua thuneihna lekkawh a tum zia a lantir chiang hle tih an sawi. 

Eiruk leh mimal duhsakna hleihluak taka lantira Srivastava puh a nihnate chu chhui chiang vek an phut thu an tarlang bawk a ni.