Tuki-a'n CM dinhmun hralh chungchangah FIR thehlut

Arunachal Pradesh chief minister hlui Nabam Tuki chuan, Noida-a news website ‘The Quint’-in a chief minister nihna hralh anga a tarlan chungchangah, Itanagar police station-ah FIR a thehlut.

Nabam Tuki hian chief minister nihna chu Pema Khandu hnenah cheng vai­belchhe 60-in a hralh a, hei hi MLA pali pawhin an hriatpui ni a tarlan a ni. Tuki chuan hemi chungchangah hian amah leh Chief Minister Pema Khandu bakah, MLA pali-te chu tihhmingchhiat tum an nih thu sawiin, chhui chian a thil diklo titute hrem an nih theih nana FIR thehlut a nih thu a sawi. ‘The Quint’chuan Supreme Court-in Arunachal-a Congress sorkar din leh tura thupek a tihchhuah hnu khan, chief minister nihna hi Tuki hian Pema Khandu hnenah hian nikum July thla khan a hralh niin a tarlang.

Tuki chuan he thil hi thu dik tawk lo leh belhchian dawl lo a nih thu sawiin, intih hmingchhiat tumna mai a ni, a ti. Politics-a a hma hun tihchhiat tumna a nih thu sawiin, kum 30 chuang politics a luhchilh hnua hetiang thil a tawn vawikhatna a nih thu a sawi. FIR-a thehluhah chuan ‘The Quint’ website bakah mimal hming pahnih a tarlan thu a sawi. Hemi chungchang hi dan anga chinfel a duh thu sawiin, thil dik lo chhui chhuah a, a titute hremna pek ngei a phut thu a sawi bawk.

Nabam Tuki hi Congress sorkar hun laia chief minister a ni a, kum 2015 kum tawp lam khan a laka hel Khalikho Pul-a leh MLA dang eng emaw zat chuan party chhuahsanin, Congress chu sorkarna chelh zui thei loin a awm phah a ni. Arunachal-ah hian President's Rule puanzui a ni a, thla khat a liam hnuah MLA hel Pul-a leh MLA dangte chuan People's Party of Aruanchal (PPA) zawmin, sorkar thar an din zui a, MLA hel hruaitu Khalikho Pul chu chief mininster atan lakluh zui a ni. Thla tam a liam hmain Supreme Court chuan Congress sorkar paihthlak a nih danah thil dik tawk lo a awm tih sawiin, Congress kaihhruai sorkar din turin thupek a tichhuak. SC-in thupek a tihchhuah hnu hian Pul-a chu CM a nihna ṭanga paihthlak a ni ve leh a, a hnu rei vak loah a office-ah thia hmuh a ni zui bawk.

SC thupek bawhzuiin, Congress chuan sorkar din turin hma a la nghal a, an MLA hel-te chu ko letin Congress kaihhruai sorkar an din leh ta a ni. Mahse MLA helte chuan Nabam Tuki-a chu CM ni zui tura an duh loh avangin, amah thlak turin Pema Khandu hi lakluh a ni ta a ni. Tuki-a'n chief minister nihna Khandu a ken danah hian thil fel lo a awm nia sawiin, Tuki hian CM nihna chu cheng tam takin a hralh ta niin ‘The Quint’ chuan a tarlang a ni.