Tripura CPI(M)-in MCC bawhchhiaah PM Modi an puh
Tripura-a Communist Party of India (Marxist), CPI-M chuan prime minister Narendra Modi chu model code of conduct bawhchhiaah an puh a, state chief electoral hnenah complaint an thehlut.
June 23-ah Tripura-a assembly seat pali - Agartala, Town Bardowali, Surma and Jubarajnagar by-election neih a ni dawn a, heng hmunah hian MCC hi hman a ni. Mahse PM Modi-a'n Mahatma Gandhi National Rural Employment Guarantee Act (MGNREGA) leh Pradhan Mantri Ujjwala Yojana chungchanga nimina virtual interaction a neih turah, state chhunga district magistrate zawng zawngte a zau thei ang bera thehdarh turin Prime Minister Office chuan a hriattir tih sawiin, CPI-M chuan Thawhṭanni khan chief electoral officer hnenah complaint an thehlut.
Chief electoral officer, Gitte Kirankumar Dinkarrao hnena complaint an thehluhah, CPI(M) central committee member Jitendra Choudhury chuan, "Prime Minister Office chuan state chhunga District Magistrate leh Collector zawng zawngte hnenah PM programme hman chu a zau thei anga thehdarh a, hmun hrang hrangah screen lian hmanga mipuite chu PM programme leh a thusawite ngaihthlak tir turin a ti a ni," a ti. Hei hi kaltlangpui a nih lohna tura state CEO chu enfiah leh inrawlh turin an ngen a, PM hian model code of conduct, Section VII para 4-in rorellai party tana official mass media dik lo zawnga hman a khapna chu a palzut a ni, a ti. Hetianga ram hruaitu berin democracy kalphungte a palzut a nih chuan, democracy ramah hian engnge la thleng zel dawn, tiin a zawt zui bawk.
Chowdhury hian a hmain Tripura chief minister Dr Manik Saha chu by-election neihna tur district pahnih a tlawh ṭumin sorkar motor hmangin, official-a kal a ni chungin inthlan kaihhnawih thil a tih tel avangin model code of conduct bawhchhiaah a lo puh tawh bawk. Chief electoral office chuan hemi chungchangah hian insawifiah turin CM Office pawh a lo hriattir tawh a ni.
CEO chuan Dinkarra chuan by-election neihna tura district pathum, West Tripura, Unakoti leh North Tripura-ah MCC hi hman mek a nih avangin, Prime Minister programme hi heng district-ah hian tihchhuah a ni ve dawn lo tih a sawi.