Manipur Poll : March 8-ah inthlan thawh hnihna

Manipur assembly election thawh khatna chu March 4 khan neih a ni a, a thawh hnihna leh tawpna ni bawk chu March 8 hian neih a ni leh dawn.

Inthlan thawh khatna neih zawh takah khan vote 84% a tla a, boruak duhawm lo thleng hriat a nih loh bakah, hel pawlte chetna thleng report a awm lo bawk. Hmun hrang hrangah buaina tenau thleng report awm mah se mipuiten a hun takah vote an thlak zo hman a ni. Inthlan thawh khatna hi district pasarihah neih a ni a, assembly constituency 38-ah kalpui niin, constituency 22-ah inthlan thawh hnihna hi neih leh tur a ni. Manipur assembly-ah hian seat 60 awmin, BJP chuan seat awm zawng zawng an chuh a, rorel lai Congress chuan seat 59-ah candidate an thehchhuak thung.

Candidate-te an hausa

Inthlan thawh khatna neih zawh takah khan candidate 167 an awm a, an zinga mi 54 chu mi hausa tawntaw, crorepati an ni. A thawh hnihna neih leh turah pawh hian candidate zinga 30% chu crorepati an ni. Congress candidate-te chu an hausa ber a, 22 zinga 20 chu crorepati an ni a, an hausakna chawhrual chu cheng vaibelchhe khat aiin a tam a ni. Party malah Bharatiya Janata Party (BJP) chuan dawtin an candidate thehchhuah 22 zinga mi pariat te chu crorepati an ni. Naga Peoples’ Front chuan panga neiin, Manipur National Democratic Front leh National People’s Party (NPP) chuan pakhat ve ve an nei bawk.

Manipur Election Watch leh Association for Democratic Reforms (ADR)-te'n an tarlan dan chuan candidate 98 zinga 29 chu crorepati an ni. Mi panga te chuan cheng vaibelchhe nga aia tam nei an ni a, vaibelchhe 2 aia tam nei mi pariat awmin, candidate 34-te chuan cheng nuai 50 chuang an nei bawk. Congress candidate Alfred Kanngam S. Arthur chu hausa berin, a thil neih hlut zawng hi cheng vaibelchhe 36 hu a ni.

Hetih lai hian inthlan thawh khatnaa candidate-te ang lo takin, candidate 98 zingah thubuai nei mi pakhat chu a awm. A thawh khatnaah khan candidate zingah mi pathum te chuan thubuai rip tak an nei mek a, an thubuai neih lai hi tualthah leh inbumna kaihhnawihte a ni. BJP candidate 38 zingah 4 in thubuai an nei a, Congress candidate 2, Manipur National Democratic Front candidate 1 leh Nationalist Congress Party candidate 1-te'n thubuai an nei a ni.

Candidate 11-te chuan an sum lakluh zat an tarlang lo a, chhiah pek dan kim chang tar lang lo mi 60 an awm bawk. Educational background tarlang zinga mi 24 te chu pawl nga leh pawl 12 inkar an ni a, mi 72-te chu graduate niin, candidate pakhat chuan ziak leh chhiar a thiam lo thung. Candidate 46-te chu kum 25 - 50 inkar an ni a, kum 51 - 80 inkar mi 52 an awm bawk.