Chamling-a'n State ṭha berah Sikkim siam tum

Sikkim Chief Minister Pawan Chamling chuan an state chu India rama state ṭha ber leh hmasawn berah siam a tum tih a sawi.

Sikkim CM Chamling chuan he thu hi an party, Sikkim Democratic Front (SDF) silver jubilee lawmnaah a asawi a ni. SDF chu mipuite party a nih thu sawiin, kum 25 chhunga mipuite thlawpna an dawn zawng zawngah lawmthu a sawi. Sikkim chu India rama state hmasawn ber te zinga mi a nih thu sawiin, a ṭha ber ni turin hma lak mek a ni, a ti. SDF-in sorkarna an chelh chhunga mipuite thlawpna vanga lawmthu sawiin, thuneihna chan chhunzawm a, Sikkim chu sang taka dah an duh tih a sawi bawk.

Pawan Chamling hi SDF kaihhruai sorkarah chief minister ni lai a ni a, a term hi a hman zawh chuan India rama chief minister ni rei ber a ni dawn. West Bengal-a Communist party hruaitu hlui, Jyoti Basu kha kum 23 chhung chief minister niin, CM ni rei ber a ni a, Chamling hian a term a hman zawh chuan kum 25 chhung CM a ni thei dawn a, Jyoti Basu a khum thei dawn a ni. Chamling hian kum 1994, December 12 aṭang khan Sikkim chief minister dinhmun hi a luah ṭan a ni.

Sikkim hi India rama 'Organic State' hmasa berah kum 2015 khan Prime Minister Narendra Modi chuan a lo puang tawh a ni. Sikkim hian state hrang hrangte hnena sorkar laipui scheme kalpui ṭha lawmman siamah award ṭhahnem tak a dawng tawh a, faina kawngah leh tourism lamahte a hmingthang hle a ni.