Bangladeh-ah hralh chhuak dawn

Tripura sorkar chuan power Megawatt 60 hralh chhuak turin Bangladesh sorkar chu inremna a ziahpui thuai dawn tih Power Minister Manik Dey chuan a sawi.

Minister Manik Dey chuan, Tripura State Electri­city Corporation Ltd (TSECL) chuan ṭhenawm ram Bang­ladesh-ah hian kum kalta chhung khan power MW100 hralh chhuah a nih thu sawiin, MW 60 hralh chhuak leh turin inremna siam a ni, a ti. Power-te hi Udaipur-a OTPC Palatana power plant aṭanga hralh chhuah a nih thu a sawi. Power MW 60 hralh chhuah leh tur hi Sepahijala district-a NEEPCO Manarchak power plant aṭanga pek chhuak tura tih a ni, a ti.

Manarchak power plant hian power MW 75 a pe chhuak mek tih Manik Dey chuan sawiin, sorkar laipui chuan power hralh chhuak tur hian phalna a pek tawh thu a sawi. ONGC chuan power plant tan hian gas a supply tawh a,a hun rei loteah hralh chhuah theih beisei a ni, a ti. Gas indaih lohna avangin power pek chhuah mekah harsatna an tawh thu sawiin, MW 101 pek chhuak thei tura duan Manarchak power plant aṭang hian MW 75 chauh pek chhuah rih a ni, a ti. An haarsatna tawh chu ONGC-te nen thawkhoin an chingfel thuai dawn tih a sawi.

Power minister chuan an haarsatna tawh chungchangah hi Ministry of Petroleum and Natural Gas-ah pawh thlen an tum thu sawiin, gas an mamawh ang pek an nih theih nana hmalak an tum thu a sawi. Duh anga tam power an pek chhuah theih loh avang hian NEEPCO chuan cheng vaibelchhe 218 a hloh tawh a ni, a ti. Power minister Manik Dey chuan an harsatna chu chinfel thuai an beisei thu leh, power MW 60 hralh chhuak tura Bangladesh sorkar nen inremna an ziah thui a beisei thu a sawi bawk.