UNC hruaitute udicial Custody-ah awm rih turin ti
Manipur High Court chuan United Naga Council (UNC) hruaitu pahnih, President Gaidon Kamei leh Publicity Secretary Stephen Lamkan-te chu Judicial Custody-ah la awm rih turin Zirtawpni khan thupek a chhuah. Hetih lai hian UNC office-bearer-te chu March 23-ah court-a inlan turin a ti.
UNC-te'n tiam chin awm loa National highway (NH) an dan chah chungchangah, R.K. Joysana chuan Court-ah Public Interest Litigation (PIL) a thehlut a, an hruaitu pahnihte hi man an ni ta a ni. PIL-ah hian NH dan chah a nih avanga mipuite chunga harsatna thlengte tarlan a ni. UNC OB-te hi court-ah inlan tura tih an lo ni tawh a, an inlan loh avangin court chuan March 23-ah inlan turin a hriattir leh a ni. UNC president leh publicity secretary-te hi nikum November 25 khan man an ni a, police custody-ah hun rei tak dah an ni tawh. Hetih lai hian Naga pawl hrang hrangte chuan an hruaitu pahnihte hi thu delhkilh awm loa chhuah an phut a, vawi eng emaw zat lungawi lohna an lantir tawh a ni.
Hetih rual hian Chief Justice Rakesh Ranjan Prasad, Justice K. Nobin leh Justice N. Koteshwor-te chuan, Manipur sorkar chu NH dan chah a nih hma leh hnua thil man inthlauhna tarlang turin a hriattir. Hei bakah hian oil-a harsatna an tawh zualpui sutkianna turin, kar khatah vawi li aia tlem lo ṭhenawm state aṭanga tanker 100 hmanga oil phur lut turin a hriattir a, tanker-te chu venhimna ṭha tak pe turin a ti bawk.