Manipur Poll : Vawiinah inthlan thawh hnihna nei dawn

Manipur aseembly election thawh hnihna leh, a tawpna ni bawk chu vawiin hian neih a ni dawn. Assembly eelction hi thawh hniha kalpui a ni a, a thawh khatna chu March 4 khan neih a lo ni tawh a ni.

Inthlan thawh hnihnaah hian vote nei mi 10,79,369 an awm a, polling station 1151 siam a ni. Lilong constituency, Thoubal, Wangkhem, Heirok, Wangjing Tentha, Khangabok, Wabagai, Kakching, Hiyanglam, Sugunu, Jiribam, Chandel (ST), Tengnoupal (ST), Phungyar (ST), Ukhrul (ST), Chingai (ST), Karong (ST), Mao (ST), Tadubi (ST), Tamei (ST), Tamenglong (ST) leh Nungba (ST)-ahte inthlan hi neih a ni ang.

Inthlan thawh hnihna hi assembly constituency 22-ah neih a ni dawn a, hemi atana campaign theih hun chu Thawhṭanni khan a tawp a ni. Tun ṭumah hian candidate 98 an awm a, BJP leh Congress party-te chuan seat awm zawng zawng an chuh dawn a ni. Candidate 98 zingah hian hmeichhia pali an tel. Manipur Election Watch leh Association for Democratic Reforms (ADR) tarlan dan chuan candidate zingah hian mi hausa tawntaw, croerpati 29 an awm a ni.

Tute nge ngaihven hlawh

Inthlan thawh hnihna neih turah hian chief minister ni lai Okram Ibobi Singh leh rights activist Irom Sharmila-te chuan ngaihven an hlawh hle. An pahnih hian Thoubal constituency-ah an inkhing dawn a ni. Politics a luhchih thu a puan aṭanga mite ngaihven hlawh, Sharmila-i chuan CM Ibobi Singh chu a dinna bialah ngei a khin tur thu a lo puang tawh a ni. Anni pahnih bakah hian BJP candidate L Basanta Singh chuan hnehna chan ngei tumin a bei ve bawk.

Manipur-ah hian Congress chuan term thum zet ro an rel tawh a, kum 15 chhungin Ibobi Singh hian chief minister dinhmun a luah thei a ni. Hnehna a chang leh thei angem tih chu mipui ngaihven a ni a, a khingpui tur Sharmila-i hian politics-ah hnuhma a la neih loh avangin ngaihven an hlawh zual a ni. Sharmila-i hi Armed Forces (Special Powers) Act (AFSPA) hlih a nih theih nan kum 16 chhung zet chaw lo nghei tawh a ni a, mi tam tak ngaihsan rawn a ni. Politics a luhchih chhan an zawh pawhin, chief minister niha AFSPA hlih a nih theih nan nasa zawka hma lak a tum thu a lo sawi tawh a ni. A party din Peoples Resurgence and Justice Alliance (PRAJA) ticket-in a ding dawn a ni.

Party candidate

Congress leh BJP chuan candidate 22 ve ve an nei a, CPI (2), Trinamool Congress (6), NCP (1) leh Independent candidate 24 an awm bawk. Anni bakah hian recognise state political party candidate 12 leh, unrecognise party canddiate 24 an awm. Congress candidate zingah hian K Meghachandra, M Okendro, Th Debendra, D Korungthang, Victor Keishing, Preshow MK Shimray, DD Thaisi leh Abdul Nasir-te chu an langsar hle. BJP acandidate zingah L Basanta, SS Ollis, Sword Vasum, Paojelet Touthang, Francis Ngajokpa, Z Kikhobou Newmai, Samuel Jendai, Adim Pamei leh Vunzagin Valte-te chu hnehna chang thei tura rinlawk an ni.

Party inbeihna

Rorel lai Congress party leh BJP-te chu inkhing tawk ber tura ngaih an ni a, party pahnihte hian hnehna chan an inbeisei thu an sawi ve ve. Manipur Pradesh Congress Committee (MPCC) chief TN Haokip chuan a term lina atan hnehna an chang leh ngei dawn niin a sawi a, mipuiten Congress kaihhruai sorkarah rinna an nghat niin a sawi. Candidate an neih ṭhat thu sawiin, hnehna chang ngei tura an beih thu a sawi bawk. BJP lam chuan Congress sorkarah mipuiten rinna an nghat ngam tawh lo niin an sawi thung a, sorkar thar an din dawn niin an inchhal ve bawk.

Manipur assembly-ah hian seat 60 awmin, March 4 khan constituency 38-ah inthlan thawh khatna neih a ni a, vawiin hian constituency 22-ah neih leh a ni ang. Seat 60 aṭang hian seat 20 chu Scheduled Tribes tana hauhsak a ni. Result hi March 11-ah chhiar a ni dawn a, result puan nghal a ni ang.