Hel chetna do let turin Assam sorkar a inpeih : Patowary

Assam Parliamentary Affairs minister Chandra Mohan Pato­wary chuan, hel chetna do let turin state sorkar a inpeih tih sawiin, mipuite chu chiai lo turin a ngen.

Minister Patowary chuan, tun hnaia hel pawl ṭhenkhatin Assam khawpui Guwahati-ah pawikhawihna thlen an tum tih hriat a ni a, hei hi a tak tak a ni em tih hriat ni lo mah se, a do let tura an inbuatsaih ṭhat thu a sawi. District tina thuneitute chu mipuite hnena thudik lo thehdarh a nih lohna turin fimkhur tura chah an ni a, social media lamah pawh thu belhchian dawl lo thehdarh lo turin mipuite an ngen tih a sawi. National Technical Research Organisation (NTRO) leh Intelligence Bureau (IB)-te pawh hemi kawngah hian hma la turin an ngen niin a sawi bawk. Hei bakah hian state sorkar chuan Space Department chu satellite aṭanga helte chet tumna ni theia ngaihte lo thlithlai turin a ngen.

Assam-a ṭhalai ṭhenkhatin hel pawl, Islamic State an zawm anga tarlan chu sorkarin a hriatpui loh thu Patowary chuan sawiin, hetih lai hian Jamaat-ul-Mujahideen Bangladesh (JMB) chuan Barpeta, Baksa, Nalbari lehd Goalpara district-ahte boruak an nei ngei tih erawh finfiah a ni, a ti. Assam police-te chuan JMB mi leh sa 56 zet an man tawh tih sawiin, heng mite hi tharum thawhna chawkchhuak turin traning ṭha tak pek an ni, a ti. India leh Bangladesh inrina lai velah an chetla nasa tih sawiin, heng mite lakah hian beihpui thlak a ni, a ti.

Assam-ah hian tunhnai khan, hel pawl United Liberation Front of Assam (ULFA)-te chuan pawikhawihna thlen an tum tih thawm a awm a, hei hian mipui a tiralṭi hle a ni. Sorkar chuan venhimna khauh zawkin a kengkawh a, hmun hrang hrangah chhun leh zanah duty dah an ni. State khawpui Guwahati chu ULFA-te hian an bitum nia sawi a ni a, hei vang hian khawpuiah hian venhimna khauh zawka kalpui a ni.

State sorkar chuan hemi chungchangah hian Thawhṭanni khan hriattirna a lo tichhuak tawh a, police-te chu venhimna khauh zawka kalpui turin a ti. Hei hi assembly-a zero hour-ah pawh sawi chhuah a ni a, BJP MLA Ashok Singhal chuan hemi chungchang hi a sawi chhuak a ni. Parliamentary Affairs minis­ter chuan chhangin, SP zawng zawngte chu inralring tura hriattir an nih thu a sawi.