AP MP-in India map ziahṭhat duh

Arunachal Pradesh BJP MP, Tapir Gao chuan India political map ziahṭhat a phut. 

Lok Sabha-a Zero Hour-ah hemi chungchang hi sawichhuakin, India political map-ah Arunachal Pradesh-a Dibang Valley bul, Angie Valley chu telh a ni lo tih a sawi a, border outpost-te pawh ram pawn lamah awm anga dah a ni, a ti. 

Chaglagam area-a Kajap leh Kayo Valley-te pawh India political map-ah hian telh an ni lo tih sawiin, Gao chuan sorkar laipui hnenah map hi siamṭha turin a ngen.

India leh China hian ramri chungchanga buaina chinfel dan a ngaihtuah mek a, ram pahnihten an aiawh tura an ruat, Special Representative pahnihten an buaipui mek a ni.

Nikum December 21 khan Special Representative-te hian meeting vawi 22-na an nei a, he hunah hian India lam aiawhte chu National Security Adviser Ajit Doval-a'n a ho a, China palaite chu State Councillor leh minister of foreign affairs Wang Yi-a'n a ho a ni. Ram pahnih aiawhte hian ramri buaina chinfel chu a rang thei anga chinfel a pawimawh thu an sawi.