Manipur Poll: Vawiinah polling station 34-ah inthlang tha dawn

Manipur Chief Electoral Officer office chuan assembly constituency 8-a polling station 34-ah vawiin hian inthlan ṭhat a nih tur thu a sawi.

CEO office chuan March 4-a inthlan thawh khatna neih zawh takah khan thil felhlel eng emaw zat a awm tih sawiin, polling station 34-ah mipuiten vote an thlak ṭha dawn a ni, a ti. Vote hi zing 7 aṭanga tlai dar 3 thleng thlak theih a ni ang. Andro Assembly Constituency-ah chuan polling station panga-ah vote thlak ṭhat tur a ni a, Uripok Assembly Constituency (1), Saikul Assembly Constituency (12), Saitu Assembly Constituency (3), Thanlon Assembly Constituency (3), Henglep Assembly Constituency (5), Saikot Assembly Constituency (1) leh Singhat Assembly Constituency-a polling station pakhat-ah inthlan hi buatsaih ṭhat leh a ni ang.

Manipur assembly election thawh hnihna leh a tawpna ni bawk chu nimin khan neih a ni a, vote a tla ṭha thawkhat hle. A thawh hnihnaah hian candidate 98 awmin, constituency 22-ah neih a ni. Thoubal, Ukhrul, Chandel, Tamenglong leh Senapati district-te a huam a ni. Ukhrul district-a polling ṭhenkhatah vote thlak a khaihlak tih Election Commission chuan a sawi. Inthlan thawh hnihnaah hian vote nei mi 3,81,381 an awm a, service voter 1159 an awm bawk. Manipur assembly election-ah hian central paramilitary force company 280 zet an duty a ni.

Hetih lai hian Thawhlehni khan Kamjong district-a India-Myarnmar borderp-ah bomb vawi hnih a puak a, security leh Assam Rifles mi leh sa ṭhenkhatin hliam an tuar. Assam Rifles mi pahnih hliam tuarte hi an ngaihtuah awm lo nia tarlan a ni.