Meghalaya Speaker-in hleilenna pungzel sawiho rawtna hnawl

Meghalaya assembly Speaker Abu Taher Mondal chuan, opposition party Hill State People’s Democratic Party (HSPDP)-te'n house-a hmeichhia leh naupangte chunga hleilenna pung zel chungchang sawiho an rawtna chu a hnawl.

HSPDP MLA Ardent Miller Basaiawmoit chuan hmeichhe awmnem zawk leh, kum naupang zawkte chunga hleilenna pung zel chuan an state hmel landan a tibawrhbang tih sawiin, hemi chungchang hi house-a sawiho a rawt a ni. Raj Bhavan chu 'young ladies club' tia sawi a ni hial tawh a, heng zawng zawng hian state hmel a timawi lo hle a ni, a ti. Raj Bhavan zahawmna tibawrhbanga puhna te, Governor-in banna a thehlut a ngai te chu a pawi takzet tih a sawi bawk.

United Democratic Party MLA Paul Lyngdoh pawhin hemi chungchang hi house-a sawiho an phut thu sawiin, speaker-in remti loa a hnawl chu pawi an tih thu a sawi. Opposition leader Donkupar Roy leh National People’s Party (NPP) MLA James K. Sangma-te chuan hmeichhia leh naupang laka sualna pung zel sawiho hi an phut a ni. Lyngdoh chuan hemi chungchangah hian special motion put luh leh an tum thu a sawi.

Meghalaya Governor V. Shanmuganathan chuan President Pranab Mukherjee hnenah ban dilna a thehlut a, a dilna hi pawmsak a ni. Shanmuganathan hi Raj Bhavan-ah mawi lo takin a che ṭhin nia sawi a ni a, Raj Bhavan staff-te chuan Prime Minister Office-ah an lungawi loh thu ziaka an thehluh hnuah a bang ta a ni. Shanmuganathan hi May 20, 2015 khan Meghalaya Governor atan lakluh a ni a, kumin kumtir lam khan a bang leh nghal a ni.