AP-in kum thum chhungin tlawhtu 19,358 a nei

Arunachal Pradesh Chief Minister Pema Khandu chuan kum thum chhungin khualzin tlawhtu mi 19,358 an nei tih house a hrilh.

Assembly session neih mekah, BJP member Gabriel D Wangsu zawhna chhangin, Khandu chuan ramchhung leh pawn aṭanga tlawhtu khualzin mi 19,358 an neih thu hi a sawi a ni. Kum 2014 chhungin tlawhtu mi 6,307 an nei tih sawiin, kum 2015-ah mi 6,453 leh kum 2016 chhunga Aruanchal tlawhtu khualzin awm zat chu mi 6,598 an neih thu a sawi. Tirap leh Longding district-ahte Tourist circuit din a nih thu a sawi bawk.

CM Khandu chuan tourist circuit-te hi Union Home Ministry hmalakna hnuaiah din a nih thu sawiin, tun hnaiah Margherita, Jairampur, Nampong, Manmao leh Pangsau-ahte hawn belh a ni, a ti. Tirap leh Longding district-ahte hawn belh leh tura hmalak mek a nih thu a sawi. Sorkar laipui chuan Arunachal-in tourism lama hma a sawn zel theihna turin ruahmanna a kalpui tih a sawi bawk.

Assembly session neih mekah hian, state Education minister Honchun Ngandam chuan Thawhṭanni khan Aruna­chal Pradesh Private Educational Institutions (Regulatory Commission) Bill, 2017 a pharh a, sawiho a nih hnuah pass a ni. Ngandam chuan, bill chu zirna kawnga hmasawn zel nana tih a nih thu sawiin, University leh College tam zawk din a nih theih nan hmalak a ni ang, a ti.

BJP MLA Tumke Bagra chu house member-te chuan Thawhlehni khan Deputy Speaker atan an thlang a, chuhpuitu an awm lo a ni. Speaker T Norbu Thongdok chuan Bagra chu a lawmpui thu sawiin, member-te'n lung­rual taka an pawm chu thil lawmawm tak a ni, a ti. Chief Minister Pema Khandu pawhin opposition member-te'n Deputy Speaker an thlawp a vangin lawmawm a tih thu a sawi bawk. Bagra hi Kalikho Pul-a kaihhruai People's Party of Aruanchal-ah khan Deputy Speaker atan thlan a lo ni tawh bawk.