Assam tuilian : Dima Hasao district tan Rs vbc 50 pe dawn

Assam sorkar chuan an state-a ruahsur avanga tuilian leh leimin avanga chhiatna tuar nasa ber district, Dima Hasao district chhawmdawlna turin Rs vbc vaibelchhe 50 a pe dawn.

District tana chhawmdawlna pek zinga Rs vbc 30 hi tuilian leh leiminin kawng a tihchhiatte siamṭhatna atan hman a ni ang.

Tuilianin an chenna in a tihchhiat, chhungkaw 590 hnenah an in siamṭhatna turin Rs nuai hnih ṭheuh pek an ni dawn a, hemi atana sum sen tur hi Rs vbc 11.80 a tling dawn a ni.

District ṭanpuina tur sum pek zinga Rs vbc 23 hi State Disaster Response Fund aṭangin pek a ni dawn a, Priority Development fund aṭangin Rs vbc 27 pek a ni ang.

Dima Hasao tana ṭanpuina pek chungchang chief minister Himanta Biswa Sarma hoa cabinet meeting neihah an rel a ni. Chief Minister chuan chhiatna thleng vanga sector hrang hranga harsatna awmte siamṭhat hna chu rang taka thawh a nih tur thu a sawi bawk.

Assam-ah hian ruahsur nasa avangin May chawlhkar hnihna aṭang khan hmun hrang hrangah tuilian leh leimin an tuar a, kawngpui leh rel kawngte a chhe nasa hle. Thuneitute chuan inkalpawhna kawng chhiate hi siamṭhat hna thawh nghal ni mah se, hun a awh rei dawn tih an sawi.

Tuilian hian ziaawm lam a pan zel a, state chhunga lui tam zawk an kam ṭan tawh a ni. Mahse district parukah mi nuai 2.90 chu tuilian hian ala tibuai a, mi eng emaw zat chu relief camp-ah an la khawsa mek bawk.