Assam-a Solar Park lian ber hawng

Assam chief minister Himanta Biswa Sarma chuan Thawhlehni khan an state-a solar park lian ber, Sivasagar district-a Amguri-a mi chu a hawng.

Amguri solar park hi ram acre 340 chuanga zauah siam a ni a, power hi MW 70 a pe chhuak thei dawn a ni. He park siamna tur lungphum hi kum 2019, February 27 khan CM hlui Sarbananda Sonowal chuan a phum a ni. Nikum December thla khan zawhfel hman tura tih ni mah se, hripui leng leh harsatna dang awm vangin a hun takah zawhfel theih a ni lo a ni.

Chief Minister chuan power siamchhuahna kawngah he park hian a pui dawn a ni tih sawiin, PM Narendra Modi-a'n electricity siamchhuahna kawnga intodelhna tur hmathlir a lo neite tihhlawhtlinna tura ke penna a ni ,a ti. State chhung hmun hrang hrangah, MW 25 pe chhuak thei tur solar power project dang pawh siam belh zel tum a nih thu a sawi.

Green energy siamna turin sorkar park chu hmalakna pawimawh tak a nih thu CM chuan a sawi a, state sorkarin electricity MW 1,000 siamchhuahna tur ruahmanna a siam a tihpuitlinna tur kawng khat a ni tiin, ṭhalaite tan pawh hna thawh tura a siamsak thei dawn tih a sawi bawk.

Amguri solar park hi Assam chauh ni lo, hmarchhak bial pumah sorkar power project lian ber a ni. He project hi solar power developer, Jackson Power Private Ltd-in a thawk a, Assam sorkar hnuaia Assam Power Generation Corporation Ltd (APGCL) chu park developer angin a awm.