Flag & constitution tel loin inremna kan siam thei lo : NSCN-IM

Sorkar laipui nena inremna siam tuma inbiakna nei mek, Nagaland helpawl National Socialist Council of Nagalim- Isak-Muivah (NSCN-IM) chuan Nagaland tana flag leh constitution hran siam tel an phutnaah chuan an la ding reng a, hengte hi pawmsak an nih loh chuan inremna an siam theih loh tur thu a sawi.

Nagaland-a NSCN-IM headquarters, Camp Hebron-a Thawhlehnia emergency national assembly an neihah NSCN-IM hian an thil phut chungchang hi an sawichhuak leh a ni.

Emergency national assemly-ah hian NSCN-IM hruaitu 2,000 dawn an tel a, flag leh constitution hran an phutna chu kalpui chhunzawm zel an rel a, India sorkar nena inremna kawng zawnga inbiakna neih pawh chhunzawm leh an rel bawk.

NSCN-IM chairman Q Tuccu chuan, Naga buaina chinfelna tur tih avanga Naga national flag leh constitution hran siam an phutna an thlauhthlak ngawt theih loh thu sawiin, an nawrna anga tlawm nghal a, khawvel mithmuha Naga mite nuihzatbura siam tir an tum lo tih a sawi.

Kum 1997 khan NSCN-IM hian sorkar laipui nena inkahhai puanna inremna a lo ziak tawh a, kum 2015 August 3-ah Framework Agreement an ziak bawk. Remna zawngin sorkar laipui chuan NSCN-IM leh Naga pawl dangte chu ṭum 85 vel inbiakna a lo neihpui tawh a ni. Naga buaina chinfelna tura inbiakna hian a hmawr a bawk dawn hnai tawh nia sawi a nih reng laiin, NSCN-IM in flag leh constitution hran an phut chungchangah hian an la inrem thei lo a ni.

Naga peace talk-a sorkar laipui palai, Intelligence Bureau special director hlui, AK Mishra chuan Nagaland hi ṭum hnih tlawh tawhin, a kal hnuhnung zawk, April 18 karah khan Nagaland chief minister Neiphiu Rio leh NSCN-IM hruaitute a hmu a ni.