Guwahati-ah July 19 thleng Total Lockdown pawtsei Assam-ah hri kai hmuh chhuah 16,000 chuang tawh
Assam sorkarin Guwahati-a hri kai pung chak venna atan total lockdown a puan chu kar khat dang pawtseiin, July 19 thleng hman a ni dawn.
Chief secretary Kumar Sanjay Krishna chuan mi hrang hrangte biakrawn a nih hnuah, khawpuia inkharkhipna kalpui hi kar khat dang pawhsei an titlu tih a sawi. Krishan chuan Kamrup Metropolitan district magistrate chuan he hri hi district Kamrup(Metropolitan) district pumah a la darh mek thu leh, mipui nawlpui tana a la hlauhawm thu a sawi a ni, a ti. Hei bakah hian health department lam pawhin khawpui chhunga hri leng mek khuahkhirh a nih theihna atan kar khat dang inkharkhipna kalpui leh hi a thlawp bawk a ni.
Assam-ah Covid-19 kai an la pung chak hle a, nimin thleng khan hri kai hmuh chhuah tawh hi mi 16,071 an tling tawh. Inrinni khan hri kai hmuh thar hi mi 535 an awm a, an zinga 410 chu Guwahati khawpuia mi an ni.
Health minister Himanta Biswa Sarma chuan hri kai hmuh tawh zinga mi 10,426 chu an dam tawh a, a kai mek hi mi 5,607 an la awm tih a sawi. Nimin khan hri kai zinga pathum an thi a, anni nen hian Assam-ah Covid-19 vanga thi hi mi 38 an awm tawh a ni. Nimina thite hi Guwahati-a GMCH Covid ICU-ah enkawlte an ni a, kum 40-63 inkar an ni.