Manipur Poll : Inthlan thawh hnihnaah vote a tla tha

Manipur assembly election thawh hnihna chu Ningani khan neih zawh a ni a, vote a tla ṭha hle. Chief Electoral Officer VK Dewangan chuan vote tla hi 86% a tling tih a sawi.

CEO Dewangan chuan, mipuiten vote an thlak ṭha tih sawiin, harsatna lian tham thleng a awm loh thu a sawi. Inthlan thawh hnihna hi assembly constituency 22 neih niin, candidate 98 an awm a, an zingah hian hmeichhia pali an awm. Rorel lai Congress party chuan seat 22-ah hian an chuh vek a, an khingpui lian ber BJP pawhin candidate 22 an nei ve bawk. Manipur-in inthlan a hmachhawn tawhah chuan vote tlak ṭhat ber ṭum a nih thu Dewangan chuan a sawi bawk. Inthlan hi Thoubal district, Kakching, Ukhrul, Chandel, Tengnoupal, Kamjong, Noney leh Jiribam district-ahte neih a ni.

Constitutency 22-ah hian vote nei mi 7,77,121 an awm a, vote 86% tlain, March 4-a inthlan thawhkhatna neih tak ai khan vote a tla ṭha zawk a ni. Polling station ṭhenkhatah inbiakpawhna a ṭhat tawk loh avangin harsatna thleng a awm. Station 1151 zinga 467-ah mipuiten vote an thlak lai live stream a ni a, station danga vote thlak laite pawh video-a lak vek a ni. Station 40-ah Voter Verified Paper Audit Trail (VVPAT) hman a ni a, hmun dang zawngah Electronic Voting Machine (EVM) hman a ni. Hmun

ṭhenkhatah VVPAT leh EMV chiang tawk lo report a awm bawk.

Vote tlak dan

District hrang hrangah vote a ṭha a, Thoubal district-ah chuan vote tla hi 89.60% a ni. Kakching district chu vote tlak ṭhatna ber niin, 91% a tling a, Chandel leh Tengnoupal-ah 79%, Ukhrul leh Kamjong-ah 81.70%, Senapati-ah 82% leh Tamenglong, Noney leh Jiribam district-ahte vote 76% a tla a ni.

Chief Minister Okram Ibobi-a dinna Thoubal bialah chuan vote 80% a tla a, EVM lamah harsatna tenau a awm vangin, hun rei vak lo chhung vote thlak a khaihlak. Chandel Assembly Constituency-ah chuan Maha Union High School-ah vote thlak a ni a, harsatna thleng lian tham a awm hriat a ni lo. Chandel biahah hian paramilitary force company 34 an duty a, mipuiten vote an thlak lai live-a pek chhuah a ni. Ukhrul-ah chuan EVM paruk tihchhiat a ni a, hei hian hun eng emaw chen vote thlak a tikhaihlak. Jiribam distric-a Assembly Constituency 40-ah chuan vote nei mi 28,140 awmin, heng zinga mi 22,924-te chuan vote an thlak a, vote tla zat hi 81.46% a tling phak a ni. Constituency hrang hrangah vote a tla ṭha a, khawl lama harsatna thleng avangin hnun ṭhenkhatah vote thlak a khaihlak thu tarlan a ni.

Lilong constituecy, Thoubal, Wang­khem, Heirok, Wangjing Tentha, Khan­ga­bok, Wabagai, Kakching, Hiyang­lam, Sugunu, Jiribam, Chandel (ST), Tengnoupal (ST), Phungyar(ST), Ukhrul (ST), Chingai(ST), Karong (ST), Mao (ST), Tadubi (ST), Tamei (ST), Tamenglong(ST) leh Nungba (ST)-ahte vote a tlak ṭhat thu tarlan a ni.

Venhimna lam

Manipur assembly election-ah hian central paramilitary force-te duty tir an ni a, company 280 zet tirhluh an ni. Police 8600 zet duty tir an ni bawk a, venhimna khauh taka kalpui a ni. General observer, expenditure observer, police observer, awareness observer, micro observer, assistant expenditure observer leh quick response team-te dah an ni. Hei bakah hian Indian Air Force helicopter MI-17 eng emaw zat an duty bawk. Hetih lai hian Aishi polling station-ah chuan bomb a puah avangin vote thlak chhunzawm a ni lo a, mipuiten vote an thlak ṭha leh dawn a ni.

Hmun ṭhenkhatah helten vote thlak tur ṭhenkhat an vau tih hriat a ni bawk. Ukhrul district-ah pawh government primary school zirtirtu H Ramkathing chu a duty laiin thah a ni a, Manipur CEO chuan a chhungte hnenah cheng nuai 20 pek a nih tur thu a puang.

Buaina tenau

Inthlan thawh hnihnaah hian buaina tenau chhuak eng emaw zat a awm a, party hrang hrangte inkara chhuak a ni. Thoubal district-a Khangabok constituency-ah chuan Congress party leh BJP worker-te inkarah buaina a chhuak a, hliam tuarte chu hospital panpui an ni. Phungyar constituency-ah chuan Congress worker mi paruk chu kidnap an nih thu police-te chuan an tarlang. Wangjing Tentha constituency bul hnaiah pawh buaina a chhuak a, a punlun hmain venhim hna thawktuten an thunun thei a ni. Wangjing Tentha constituency-ah pawh Communist Party of India leh Congress worker-te inkarah buaina a chhuak a, thi leh hliam an awm hriat a ni lo.

Vote thlak ni, Nilaini khan Thangal market-ah China siam hand grenade tihpuah a ni a, mi pahnihin hliam an tuar. Police-te chuan bomb puahna bul hnaia awm dawr nghaktu hmeichhe pahnih chuan hliam an tawrh thu sawiin, damdawi-inah dahluh nghal an nih thu an sawi. Thawhlehni khan India-Myarnmar border-ah bomb tihpuah a ni bawk a, polling official pakhat a thih bakah, Assam Rifles mi leh sa pahnihin hliam an tuar a ni.

Election kaihnawihah hian pawisa fai Rs 2,25,28,200 man a ni a, ruihhlo ṭha­hnem tak man a ni bawk. March 4-a inthlan thawh khatna neihna polling station eng emaw zatah inthlan buatsaih ṭhat a ni a, a thawh hnihnaah pawh hian inthlan ṭhat ngaihna hmun a awm bawk. Vote tla te hi March 11-ah chhiar a ni dawn a, result puan nghal a ni ang.