Manipur Poll: Polling Station 34-ah inthlang Ṭha

Manipur assembly election chu March 4 leh 8 khan neih a ni a, March 9 khan polling station 34-ah inthlan ṭhat leh a ni. March 4-a inthlan thawh khatnaah khan thil fel lo eng emaw a awm avangin inthlan ṭhat hi buatsaih leh a ni.

State Chief Election Officer Vivek Kumar Dewangan chuan district pariata polling station 34-ah inthlan hi buatsaih ṭhat a ni thu sawiin, vote pawh a tla ṭha thawkhat hle a ni, a ti. Election Commission of India thupek angin mipuiten vote an thlak ṭha leh tih sawiin, boruak duhawm lo thleng liantham a awm lo niin a sawi. Polling station zawng zawngah venhimna khauh taka kenkawh a nih thu leh, central paramilitary force company 12 bakah Manipur strike force company 20 zet an duty thu a sawi.

Dewangan chuan, vote thlak nana hman Electronic Voting Machines (EVMs)-te chu District Headquarter-ah Ningani khan Helicopter hmanga phur thlen vek a nih thu a sawi. Mipuiten vote an thlak ṭha hle tih sawiin, Manipur-in aseembly election a hmachhawn tawhah chuan vote tlak ṭhat ber ṭum a ni, a ti. Inthlan thawh khatnaah khan vote 84% a tla a, March 8-a inthlan thawh hnihna neih a nih khan vote 86% a tla a, Ningani-a inthlat ṭhat buatsaihah pawh hian vote a tla ṭha thawkhat hle. Vote tla te hi March 11 hian chhiar a ni dawn a, result puan nghal a ni bawk ang.

Inthlan thawh hnihna neihna hmun ṭhenkhatah buaina a chhuak a, Imphal East-a Andro Constituency-ah chuan Congress party worker leh BJP mi leh sa te chu an intibuai a ni. BJP workers Thokchom Ningthem chuan Itham Moirangpurel Tumukhong-a booth endik tura an kalna chu Congress mi leh sa ten lo tidingin buaina hi a inṭan a, mi pariatin hliam an tuar tih a sawi. Hliam tuarte hi JNIMS hospital-ah dahluh an ni a, an zinga mi pahnihte chu an dinhmun a ṭha lo hle nia tarlan a ni. Andro constituency-ah hian polling station panga-ah inthlan ṭhat a ni.

Manipur assembly-ah hian seat 60 awmin, rorel lai Cong­ress leh BJP-te chuan sorkar­na siam tumin nasa takin an inbei. Official ṭhenkhat chuan party mala sorkarna siam thei an awm an rin loh thu an sawi. BJP chuan candidate ngah berin seat awm zawng zawng 60-ah an chuh vek a, Congress chuan seat candidate 59 a siam.