Meghalaya-in power hman man ba hnem

Meghalaya sorkar chuan March 2, 2017 thleng khan hmun dang aṭanga power leina man cheng vaibelchhe 527.07 ba an nei tih House-ah tarlan a ni.

Power Minister Sniawbhalang Dhar chuan, state sorkar-in North Eastern Electric Power Corporation (NEEPCO) leh central generating station aṭangin power leina man hi a ba tih a sawi. Meghalaya Power Distribution Company Limited (MePDCL) chuan power leina leiba te chu thla tin a rul ṭhin a, mahse chhiah aṭanga sum hmuh a tam loh avang leh sum indaihlohna avangin hun eng emaw chen chu leiba rulh theih a ni lo, a ti. Question Hour-a zawhna chhangin, leiba rulh a nih theih nan hian state sorkar leh MePDCL-te chuan theihtawp chhuaha hma an lak thu a sawi.

Power Minister chuan company leh mimal anga leiba neite vanga harsat an tawh nasat thu sawiin, Sai Prakash chuan power hman man leiba cheng vaibelchhe 35 an nei a ni, a ti. Hei bakah hian CMJ Brewerie (vbch 1.2), Bomber Cement (vbch 0.23), RNB Carbide (vbch 4.5), JUD Cement (vbch 22) leh Meghalaya Cherra Cement Limited-te chuan cheng vaibelche 18 an ba tih House a hrilh. Power-a intodelhna tur leh, leiba tihtlem a nih theih nan sorkar laipui scheme Ujwal Discom Assurance Yojana (UDAY) chu kalpui a nih thu a sawi bawk.