Manipur-ah hel 14 an inpe

Manipur-ah hel pawl, United Tribal Liberation Army (UTLA) (James faction) member 14-te chu Nilaini khan chief minister N Biren Singh-a hmaah an ralthuamte dahin, sorkar kutah an inpe. Hel inpe zingah hian an pawl chairman pawh a tel.

Imphal-a Manipur Rifles 1st Battalion Banquet Hall-ah hel inpe te pual hian 'Homecoming Ceremony' buatsaih a ni a, he hunah hian hel 14-te hian an ralthuam - KH-33 rilfe pahnih, AK rifle pakhat, A1 rifle pakhat, A2 rifle pakhat, single barrel rifle pathum leh silai dang pathum, Chinese hand grenade pakhat, gelatin tlawn 18, detonator 18, leh silai mu eng emaw zat an thehlut a ni.

Hel inpete hi chhawmdawlna pek an ni dawn tih Chief Minister chuan a sawi a, an bank account-ah fixed deposit-in kum thum atan Rs nuai li ṭheuh dah sak an ni dawn a, hei bakah hian thlatin stipend Rs 6,000 pek an ni ang. An ralthuam thehluh man hu pawh hi pek an ni dawn bawk tih a sawi. Sorkarin rehabilitation camp a siamah kum thum an awm ang a, he hmunah hian thiam thil hrang hrang zirtir an ni ang.

CM chuan rehabilitation camp-ah hian hel inpe 681 dah ni tawhin, an zinga 638 chu an awm chen tur awmin nunphung pangngaiah an let tawh tih a sawi. Tunah hian mi 43-ten training an la nei mek a ni, a ti.