Assam CM nupuiin an puhna a pha

Assam chief minister Himanta Biswa Sarma nupui, Riniki Bhuyan Sarma chuan Covid-19 hripui len laiin, a firm hminga PPE kits a supply nia puhna chu thu dik lo niin a sawi.

The Wire leh Guwahati-based website, The Cross Current-ten RTI chhanna aṭanga report an siamah, hripui len zual lai khan firm pali hnenah emergency medical supply order pek a ni a, heng zinga firm pathum chu CM nupui Bhuyan leh CM chhungkua nena inzawmna nei an ni tih an tarlang.

Report-ah hian Bhyan company, JCB Industries hnenah PPE kit 5,000 order siam a ni. He company hian a hmain medical supply lam engmah la ti ngai lo chungin National Health Mission-Assam chuan tender pawh tichhuak loin order hi a siam tawp niin a tarlang. Hetih lai hian CM Sarma chuan health ministry a chang tel bawk a ni.

CM nupui Riniki Bhuyan chuan an puhna hi chhangin, kum 2020, March chawlhkar hmasa ber khan Assam-ah PPE kit lei tur pawh a awm lo a, hei vang hian sumdawnna lam a a thawhpuite biain, NHM-Assam hnenah PPE kit 1,500 chu a pe zawk niin a sawi. He thil supply-na aṭang hian sum eng zat mah a la lo niin a sawi bawk.