AP-a IAS officer transfer a nih danah CM lawm lo

Arunachal Pradesh chief minister Pema Khandu chuan Delhi khawpuia sports stadium-a ui an kal kualpui duh vanga infiammi awmte chhuahtir nia puh, IAS officer nupate transfer nghal an nih chungchangah, sorkar laipui thiltih dan chu pawi a tih thu a sawi.

Delhi-a IAS officer nupate hi sports stadium-a thil thleng avang hian Arunachal Pradesh leh Ladakh-ah sawn nghal a ni.

Chief Minister chuan, "Arunachal Pradesh hi Arunachal Pradesh, Goa, Mizoram and Union Territories (AGMUT) cadre hnuaia mi a nih avangin, kan state-a posting siam tur pawh hi he cadre hnuaiah vek hian siam a ni tur a ni. Hetianga sorkar laipuiin a ti mai hi a pawi hle a, mahse kan lo pawm mai a ngai a ni," a ti.

Mi ṭhenkhat chuan an thuneihna dik lo taka hmanga puh, IAS officer-te nupa sawnchhuah nghal an nih chungchangah sorkar laipui chet dan chu an fak hle a, hetih lai hian mi tam tak chuan India rama hmun mawi ber zingah sawn an nih vangin, hei hi hremna angah pawh ngaih theih a ni chiah em, an ti ve thung.