Manipur-in Pre-Nursery - Class V tan online exam a khap

Manipur education department chuan an state chhunga private school leh aided school-te hnenah April-July thla chhung naupangte hnen aṭanga tuition fee laksak lo turin a hriattir. Hei bakah hian Pre-nursery aṭang Class V chin tan online assessment leh examination buatsaih a khap bawk. 

Department-in thupek a tihchhuahah hian, school zingah fee lo la tawh an awm a nih avangin, July thla hnu lama an fee tur atana siamrem turin a ti bawk. Hei bakah hian academic session thar atan admission fee tisang lo turin a hriattir bawk a ni. 

Manipur-ah hian March thla aṭang khan zirna in te khar vek an la ni. April-July thla chhunga tuition fee la lo tura private school leh aided school-te a hriattir rual hian, zirlai 700 aia tlem nei school-a thawk, teaching leh non-teaching staff-te chu April-July thla hlawh chu 50% pe turin a ti a, zirlai 700 chuang nei school-te chu thawktute an hlawh pangngai pe turin a ti bawk.