Nagaland police-ten hmarchhak biala Quarantine Centre lian ber an siam

Nagaland police-te chuan Ganeshpur-ah khum 1,027 awmna qua­rantine centre an siam a, hmarchhak biala quarantine center lian ber a ni. 

DGP T John Longkumer chuan state sorkarin coro­navirus leng mek a dona kawnga an lo puihna atan Community Oriented Police Service (COPS) hmalaknain  he centre hi siam a ni tih a sawi. He hmun hi state dang aṭanga lo hawte lo khung hranna atan hman a ni dawn a, DIG(training) Aotemusi kaihhruai police team-in centre siam leh a buaipui hna hi an thawk a ni. 

Centre-ah hian police medical team duty tir an ni a, sample lakkhawm leh TrueNat system hmanga swab test neih pawh an ti nghal bawk. Nagaland-ah hian nimin zing khan hri kai mi 23 hmuh belh leh an ni a, anni nen hian hri kai hmuh chhuah tawh hi mi 771 an awm tawh a ni. Hri kai zinga mi 313 chu enkawl dam an ni tawh a, a kai mek hi mi 458 an la awm.