Manipur Assembly Election : Party mala sorkarna siam thei an awm lo

Manipur assembly election 2017 result chu Inrinni khan puan a ni a, party mala sorkarna siam thei an awm lo.

Congress party chuan seat la hnem berin, an khingpui ber BJP chuan an dawt a ni. Congress party hian seat 28 lain, sorkarna siam theih khawpin seat an la tam tawk lo. Hetih lai hian BJP chuan nasa takin hma an sawn a, seat 21 an la a ni. BJP hian assembly election hnuhnung ber khan seat pakhat mah an la lo. National People’s Party leh Naga People’s Front (NPF)-te chuan seat li ve ve an la a, Lok Janshakti Party leh All India Trinamool Congress-te chuan seat pakhat ve ve lain, Independent candidate pakhatin seat a la bawk. Party dangte seat lakzat hi 11 a ni. Party mala sorkarna siam thei an awm loh avangin, seat la tam Congress leh BJP-te chuan party dang an thawhpui a ngai dawn a ni. Hetih lai hian 'Manipur Iron Lady' Irom Sharmila-i party, Peoples Resurgence and Justice Alliance (PRAJA) chuan seat pakhat mah an la lo.

Manipur assembly-ah hian seat 60 a awm a, sorkarna siam tur chuan seat 31 lak a ngai a ni. Party mala sorkarna siam thei an awm loh avang hian sorkarna siam turin party thawhho a ngai dawn a ni. Congress party chuan seat 28 a nei sa a, sorkarna siam turin seat thum a mamawh a, an dinhmun a ṭha bera ngaih a ni. Hetih lai hian BJP chuan party dang zawng leh Independent MLA a thawhpui thei a nih chuan sorkarna an siam thei dawn bawk. Manipur state Congress hruaitu T.N. Haokip chuan, sorkarna siam leh tura hma an lak nghal thu leh, sorkarna an siam leh ngei tur thu a sawi. Hemi tur hian party dang pawh thawhpui atan an sawm tawh thu a sawi bawk.

Hetih lai hian BJP thupuangtu Nongthombam Biren chuan, sorkarna an siam ngei a rin thu sawiin, hemi tur hian hma an lak thu a sawi. Party dangte nena thawk ṭhoa a vawi khatna atana sorkarna siam tura an inrintawk thu a sawi.

Party chetṭhat dan

Kum 15 chhung zet ro rel tawh Congress party chuan seat 40 awmna, Imphal Valley-a district parukah vote an hmu ṭha a, seat an lak tamna ber a ni. Hetihlai hian seat 20 awmna, hill district 10-ah chuan an che ṭha lo hle a, BJP leh NPF-te an che ṭha thung. Thoubal constituency-ah chuan chief minister ni lai Ibobi Singh chuan chiang takin hnehna a chang a, a khingpui People’s Resurgence and Justice Alliance party nominee, Irom Sharmila chuan vote 100 pawh a hmu tling lo a ni. Ibobi Singh hian vote 15,000 zet a hmu a, BJP candidate Leitanthem Basanta Singh pawhin vote a hmu sang lo hle bawk.

Congress candidate langsar zingah minister nilai Akoijam Mirabai chu Patsoi bial aṭangin hneh taka thlan tlin a ni. BJP candidate langsar T. Radheshyam chuan hnehna a chan laiin, Chief Ministerial candidate Thounaojam Chaoba Singh chuan hnehna a chang zo lo. A ni bakah hian BJP ticket-a ding Regional, Institute of Medical Sciences director hlui, L. Fimate chuan Tipaimuk constituency-ah hnehna a chang zo lo ve bawk. PRAJA candidate Sharmila chu hnehna chang zo lo langsar ber te zinga mi a ni a, vote 100 pawh a hmu tling lo a ni. BJP hruaitu Nimaichand Luwang chuan Congress party chuan sum an chelek nasa hle niin a sawi.

NPF-in BJP an thlawp dawn

Nagaland Chief Minister Shurhozelie Liezietsu chuan inthlan result puan a nih hnu lawkah, Naga People`s Front (NPF) chuan sorkarna siam turin BJP an thlawp dawn tih a sawi. Congress leh a thawhpui party-te an thlawp dawn lo tih sawiin, sorkarna siam turin BJP an thawhpui dawn tih a sawi. Manipur mipuiten NPF candidate an vote avangin lawmthu a sawi bawk. Union Minister leh Lok Janshakti Party (LJP) hruaitu ni bawk Ram Vilas Paswan chuan, BJP an thlawp tur thu Inrinni khan a sawi tawh bawk. LJP hian seat khat an la a, sorkarna siam turin BJP an thlawp dawn tih an tichiang tawh. LJP candidate Karam Shyam chu Longthanbal bial aṭanga thlan tlin a ni.

Hetih lai hian National People’s Party, All India Trinamool Congress leh Independent candidate-te chuan Congress party nge, BJP an thlawp zawk dawn an la tichiang lo thung.

CM Okram Ibobi chuan, Congress kaihhruai sorkarah mipuiten rinna an nghat ngam tih sawiin, kum 15 chhunga hmasawnna hna an lo thawh tawhte chu an hmuh hmaih lo a ni, a ti. A kaihhruai sorkarah rinna an nghat ngam chu lawmawm a tih thu sawiin, sorkarna an siam leh pawhin mipuite hmasawnna chu an ngaihpawimawh ber a nih tur thu a sawi.

Party hrang hrang seat lakdan :

Congress : Seat 28,

Bharatiya Janata Party : Seat 21

National People’s Party : Seat 4

Naga People’s Front (NPF) : Seat 4

Lok Janshakti Party : Seat 1

All India Trinamool Congress : Seat 1

Independent : Seat 1

BJP candidate Kongkham Robindro chuan Mayang Imphal bialah, amah hnaih bertu Congress candidate chu vote 2000 chuangin a hneh a, inhnehna sang ber a ni.